BQO-da «Imrat Group» qarjy pıramıdasynyń bylyǵy áshkerelendi

ASTANA. KAZINFORM - Qarjylyq monıtorıng agenttigi Batys Qazaqstan oblysy boıynsha departamenti «Imrat Group» atty qarjy pıramıdasynyń qyzmetin toqtatty.

Kanadanyń, Gonkong pen Ulybrıtanııanyń atynan tirkelgen jalǵan halyqaralyq ınvestıtsııalyq kompanııa retinde jasyrynyp, alaıaqtar azamattarǵa kúndelikti 0,5%-dan 1,5%-ǵa deıin «joǵary tabys» ýáde etken. Qatysý úshin azamattar arnaıy referaldy silteme arqyly tirkelip, krıptovalıýta ámııanyna 20-dan 10 000 AQSh dollaryna deıin (USDT balamasynda) qarajat aýdarýy qajet bolǵan. Alaıda shyn máninde, salymdar tek pıramıda ishindegi qatysýshylar arasynda qaıta bólinip otyrǵan – tólemder jańadan tartylǵan qarajat esebinen júrgizilgen.

Qatysýshylardy tartý maqsatynda kúdiktiler zańdy ınvestıtsııalyq qyzmet túrinde kórsetý úshin belsendi jarnama júrgizip, keńseler jaldap, túrli prezentatsııalar men konferentsııalar uıymdastyrǵan. Sondaı-aq Telegram-arna ashyp, onda turaqty túrde joǵary tabys pen ınvestıtsııalardyń qaýipsizdigin nasıhattaıtyn beınematerıaldar jarııalap otyrǵan.

Zańsyz qyzmet der kezinde toqtatylǵanynyń arqasynda pıramıdaǵa barlyǵy 30 azamat tartylǵan. Olardyń salǵan qarajaty 89 mln teńgeden asady.

Qylmystyq is sotqa joldandy.

QR Qylmystyq-protsestik kodeksiniń 201-babyna sáıkes ózge aqparat jarııa etilmeıdi.

- Qarjylyq monıtorıng agenttigi qarjy pıramıdalarynyń jolyn kesý jáne olardy anyqtaý boıynsha júıeli jumystardy jalǵastyryp jatyr. 2025 jyldyń basynan beri 31 qarjy pıramıdasyna qatysty 90 sotqa deıingi tergep-tekserý aıaqtaldy. 7 mlrd teńge kóleminde zalal óteldi. Jalǵan ınvestıtsııalyq jobalar týraly aqparat taratqan 14 myńnan astam ınternet-resýrs buǵattaldy. Instagram men Telegram platformalarynda 535 myńǵa jýyq qatysýshysy bar 100-den astam zańsyz chattar jabyldy, - dep habarlady agenttik.

Aıta keteıik, Óskemende qarjy pıramıdasyna jarnama jasaǵan áıel jazaǵa tartyldy.