BQO-da ıeleri qaryzyn ótemegeni úshin 244 kólik arnaıy turaqqa qoıyldy
ORAL. QazAqparat - Oralda túrli berejaqtary bar kólik ıelerin anyqtaý maqsatynda reıdtik sharalar júrgizilýde, dep habarlaıdy QazAqparat tilshisi.
BQO polıtsııa jáne memlekettik kirister departamentteriniń birlesken josparyna sáıkes osylaısha jyljıtyn jáne jyljymaıtyn múlik úshin salyq, jylý jáne elektr qýaty úshin tólemaqy tólemegen, ákimshilik aıyppulyn ótemegen jeke tulǵalarǵa shara qoldanylýda.
Polıtsııa departamentiniń baspasóz qyzmetinen túsken málimetke qaraǵanda, 19-23 qazan aralyǵynda ıeleri 1 mln 301,499 myń teńge qaryzdan qutylmaǵany úshin 21 avtokólik ustaldy. Sonyń ishinde ótelmegen aıyppul boıynsha (153 729 teńge) 13, kólik quraldaryna salyq tólemeý boıynsha (211 588 teńge) 5, zańdy tulǵalardyń bereshegi boıynsha (836 933 teńge) 2 jáne banktik zaıym boıynsha (99 219 teńge) 1 avtokólik toqtatyldy.
Jyl basynan beri sot sheshimderine sáıkes ıelerinen qaryzdy májbúrlep óndirý úshin 868 avtokólik ustaldy. Sonyń ishinde ıeleri salyq, jylý jáne elektr qýaty úshin 841 mln 008,599 teńge qaryzdy tolyqtaı óteýi úshin 244 kólik arnaıy turaqqa qoıyldy. Sonymen qatar 27 mln 120,113 myń teńge tólenbegen ákimshilik aıyppuldar boıynsha 593 avtokólik toqtatyldy.
