BQO-da habarsyz ketken 17 jastaǵy bozbala izdestirilip jatyr
BQO polıtsııa departamentiniń baspasóz qyzmeti málim etkenindeı, Báıterek aýdany Darııan aýylynyń turǵyny, bıylǵy 29 tamyzda 18 jasqa tolatyn Aleksandr Golohvastov ótken jyldyń tamyzynda Oral qalasyna oqýǵa shyǵyp ketkennen úıine oralmaǵan.
Departamentten túsken málimetke qaraǵanda, qaladaǵy №12 kolledjde bilim alatyn A.Golohvastov oqý ornyna birde baryp, birde barmaı júredi. Úıine anda-sanda habarlasady. Qalada kórgen adamdar bolǵanymen, naqty júrgen jeri belgisiz. Anasy Syrym aýdany Alǵabas aýylynda, ákesi men ájesi Darııanda turady.
«Anasy ulyn izdep, sońǵy kezde ǵana polıtsııaǵa júgingen. Sondyqtan izdeý jarııalandy. Aleksandrdyń boıy 165-175 sm, ishki ister organdarynda esepte turmaıdy. Bozbalany kórgen, qaıda ekenin biletin adamdar bolsa, 8(71134) 31-1-37, 31-1-45, 8-777-860-91-11, 8-771-181-10-10 telefondaryna qońyraý shalýlary suralady», dep habarlady vedomstvodan.
Eske sala keteıik, budan buryn Oralda iz-túzsiz ketken 16 jasar stýdenttiń tabylǵanyn jazǵan bolatynbyz.
