BQO-da «GAZel» júk kóligi otqa orandy
ORAL. QazAqparat - Keshe saǵat 18.23-te Aqjaıyq aýdany ortalyǵy Chapaev aýylynda ornalasqan «Qazmunaıgaz ónimderi» JShS-nyń janar-jaǵar maı quıý stansasynda órt bolyp jatqany jóninde málimet túsken, dep habarlaıdy «QazAqparat» tilshisi.
Aýdandyq TJ bóliminiń basshysy Temirhan Qajyǵalıevtiń aıtýynsha, oqıǵa ornyna órt sóndirýshiler men basqa qyzmetter jedel jetken kezde «GAZel» júk kóliginiń otqa oranǵany belgili boldy. Janar-jaǵar maı stansasyna jaqyn bolǵandyqtan, sol jer qorshaýǵa alynyp, úsh baǵyttaǵy jol jabyldy.
Abyroı bolǵanda, eshkim zardap shekken joq. Órt sanaýly mınýttarda sóndirildi. 20 mınýttan keıin jol qozǵalysy qaıta jandandy.
BQO TJ departamenti baspasóz qyzmetinen túsken aldyn ala málimetke qaraǵanda, órttiń shyǵýyna avtokóliktiń tehnıkalyq aqaýy sebep bolǵan.
Qazirgi kezde órttiń shyǵý sebebi men kináli adamdar, keltirilgen shyǵyn anyqtalýda.
