BQO-da gaz qondyrǵylaryna qyzmet kórsetetin kompanııa jaýapqa tartylýda

ASTANA. QazAqparat - Batys Qazaqstan oblysynda tergep-tekserý qorytyndysy boıynsha naryq sýbektisi «RTsKÝ-Ýralsk» jaýapkershiligi shekteýli seriktestiginiń monopolııaǵa qarsy zańnamany buzǵandyǵy anyqtaldy, dep habarlaıdy QR UEM TMR BQK-niń baspasóz qyzmeti.

«QR Ulttyq ekonomıka mınıstrligi Tabıǵı monopolııalardy retteý jáne básekelestikti qorǵaý komıtetiniń Batys Qazaqstan oblysy boıynsha departamenti monopolııaǵa qarsy zańnamany buzý faktisi boıynsha «RTsKÝ-Ýralsk» jaýapkershiligi shekteýli seriktestigine qatysty tergep-tekserý amaldaryn aıaqtady», delingen habaralamada.

Tekserýge atalǵan JShS-nyń úıishilik gaz qondyrǵylaryna tehnıkalyq qyzmet kórsetý baǵasynyń joǵary bolýyna qatysty turǵyndardyń kóptegen aryz-shaǵymdary sebep bolǵan.

Tergep-tekserý nátıjesinde, QR Kásipkerlik kodeksiniń 174-babynyń 1-tarmaqshasyna sáıkes, Qazaqstannyń monopolııaǵa qarsy zańnamasyn buzý faktisi anyqtaldy. Atap aıtqanda, «RTsKÝ-Ýralsk» JShS úıishilik gaz qondyrǵylaryna tehnıkalyq qyzmet kórsetý baǵasyn negizsiz kóterip, joǵary baǵa belgilegen.

Qazaqstan Respýblıkasynyń ÁQBtK-niń 159-baby 3-bólimine sáıkes, ústem jaǵdaıdy asyra paıdalaný, ıaǵnı monopolııalyq joǵary baǵalardy belgileý, ustap turý faktisi boıynsha ákimshilik is qozǵaý týraly sheshim qabyldandy. Atalǵan fakti boıynsha hattama toltyrylyp, sotqa joldandy.