BQO-da gaz ben elektr jaryǵyna Reseıge táýeldilik qashan sheshiledi – ákim jaýaby

ASTANA. KAZINFORM – Batys Qazaqstan oblysynyń keıbir aýdandary men eldi mekenderi kórshi Reseı gazy men elektr energııasymen qamtylǵan. Oblys basshysy Narıman Tóreǵalıev syrtqy táýeldilikti azaıtyp, máseleni sheshý joldaryn atady.

«Energetıka salasyna qatysty mańyzdy másele táýeldilikti azaıtý. Búginde oblystyń Jánibek jáne Bókeı Ordasy aýdanyn elektr jaryǵymen tolyqtaı Reseı Federatsııasy qamtyp otyr. Osyǵan baılanysty qazir 5 megavatty gaz porshendi qondyrǵysyn ornatý boıynsha kelissóz júrgizip jatyrmyz», - dedi Narıman Tóreǵalıev Ortalyq kommýnıkatsııalar qyzmeti alańynda ótken baspasóz máslıhatynda. 

Onyń aıtýynsha, atalǵan jumys Energetıka mınıstrligimen birlese atqarylady. 

«Gaz salasy boıynsha, oblysta 4 eldi meken Reseıden keletin gazben qamtylǵan. Atap aıtqanda, Jánibek aýdanynda 3 aýyl (Qamysty, Borsy, Talov) jáne Báıterek aýdanynda 1 aýyl (Razdolnoe). Búginde Jánibek aýdany boıynsha qurylys jumystaryna jaýapty merdiger kompanııa anyqtalyp, kelesi jyly júzege asyrylady. Al Báıterek aýdany boıynsha joba jasaqtalyp jatyr», - dep túsindirdi óńir basshysy. 

Buǵan deıin BQO ákimi tasqynmen kúres jáne onyń saldaryn joıý jumystary týraly aıtqan edi.