BQO-da esirtkige qatysty 346 quqyq buzýshylyq anyqtaldy
ORAL. KAZINFORM — Batys Qazaqstan oblysynda ótken jyly esirtkige qatysty 346 quqyq buzýshylyq deregi anyqtaldy, bul aldyńǵy jylǵydan (247) edáýir kóp.
BQO polıtsııa departamenti esirtki qylmysyna qarsy is-qımyl basqarmasynyń bastyǵy, polıtsııa podpolkovnıgi Marat Súgirovtiń óńirlik kommýnıkatsııalar qyzmeti alańynda ótken brıfıngide málim etkenindeı, onyń 120-sy (2023 jyly — 94) qylmys, sonyń ishinde 61-i (33) esirtki zatyn satý deregi esebinde tirkeldi.
Onyń sózine qaraǵanda, 119 kg 700 gramm esirtki zaty zańsyz aınalymnan alyndy.
— Telegram 2 ınternet-dúken arqyly gashısh esirtki zatyn zańsyz satýmen aınalysqan 5 qatysýshydan quralǵan uıymdasqan qylmystyq top quryqtalyp, jumysy toqtatyldy. 500 daıyndalǵan esirtki tárkilendi, munyń 2,5 myńnan astam dozasy — gashısh. Aqsha aınalymy 131 mln 922,154 myń boldy. Barlyq qatysýshylar (uyımdastyrýshy, esirtki jasyrýshy, operator) ustalyp, QR QK 262-babyna sáıkes sotqa deıingi tergeý amaldary júrgizilýde, — deıdi M.Súgirov.
Basqarma basshysynyń aıtýynsha, 3 qatysýshydan turatyn qylmystyq toptyń Almaty oblysynan Qazaqstannyń batys óńirlerine esirtki quraldaryn jetkizý arnasy joıyldy. Olar Almaty oblysyndaǵy ýaqytsha turatyn jerinde sıntetıkalyq esirtki quraldary men psıhotroptyq zattardy daıyndaıtyn jasyryn zerthana uıymdastyrǵan. 5 kg sıntetıkalyq esirtki zaty tárkilenip, bir rettik qoldanylatyn 15 myń esirtki dozasynyń joly kesildi. Sotqa deıingi tergeý amaldary júrgizilýde.
— Oblys boıynsha 26 esirtki jasyrýshy ustalsa, sonyń jeteýi — jasóspirimder. Ótken jyly Qostanaı oblysynyń eki turǵynynan (bireýi — jasóspirim) 2 181 dozaǵa teń keletin 727 gramm sıntetıkalyq esirtki alyndy. Esirtki tektes shópterdi ósirgen 5 fıtozerthana anyqtaldy. Barlyǵy 162 esirtki saıty anyqtalyp, buǵattaldy. Esirtki zatyn jarnamalaǵan 4 adam (bireýi kámeletke tolmaǵan) qolǵa túsip, QR QK 299-1-babyna sáıkes tergeý amaldary júrgizilýde, — dedi M.Súgirov.
Eske sala keteıik, budan buryn Oralda jábirlenýshilerge 5 mln teńge zalal keltirgen alaıaq ustalǵanyn jazǵan bolatynbyz.