BQO-da esirtkige qatysty 140-qa jýyq quqyq buzý tirkeldi
ORAL. KAZINFORM — Batys Qazaqstan oblysynda bıylǵy segiz aıda 136 esirtki quqyq buzýshylyǵy anyqtaldy.
BQO polıtsııa departamenti esirtki qylmysyna qarsy is-qımyl basqarmasynyń aǵa jedel ýákili, polıtsııa podpolkovnıgi Baǵdat Túgelovtiń óńirlik kommýnıkatsııalar qyzmeti alańynda ótken brıfıngte málim etkenindeı, sonyń 68-i — qylmys, 69-y — qylmystyq teris qylyq.
Baǵdat Amanjolulynyń sózine qaraǵanda, 68 esirtki qylmysynyń 43-i satý, 22-si esirtki ósimdikterin ósirýge qatysty.
— Zańsyz aınalymnan 260 kg 939 gramm esirtki zattary tárkilendi. Sonyń ishinde kannabıs ósimdigi — 17 kg 043 gramm, marıhýana — 239 kg 581 gramm, sıntetıkalyq esirtkiler — 4 kg 288 gramm. Bıyl quramynda esirtki zattary bar ósimdikterdi zańsyz ósirýge arnalǵan 10 fıtozerthana áshkerelendi, — deıdi Baǵdat Túgelov.
Onyń aıtýynsha, Oral qalasynda qarasora ósirýge arnaıy jabdyqtalǵan úı-jaılar anyqtalyp, olardyń qyzmeti toqtatyldy.
Nátıjesinde 30-dan astam qarasora túbi, ósimdik tektes zattar jáne arnaıy jabdyqtar (jaryqtandyrý qurylǵylary, jeldetkishter) tárkilendi. Onyń ishinde fıtozerthanalardyń birin joıý barysynda 16 kılodan astam kannabıs shyqty. Sondaı-aq taǵy bir jaǵdaıda qosymsha 14 mln 240 myń teńge kólemindegi aqshalaı qarajat pen býyp-túıilgen esirtki zaty tabyldy.
Sol sekildi sáýir aıynda jedel is-sharalar nátıjesinde Aqtaý qalasynda elimizdiń ońtústik óńirlerinen batys oblystarǵa esirtki jetkizý arnasynyń joly kesildi. Atalǵan operatsııa barysynda zańsyz aınalymnan 35 kılodan astam esirtki quraldary alyndy.
Sondaı-aq 2026 jyldyń ekinshi toqsanynda Oral qalasynyń aýmaǵynda Telegram messendjerinde jumys istegen ınternet-dúkeniniń qoımashysy qyzmetin atqarǵan 6 adam ustaldy. Tárkilengen sıntetıkalyq esirtki quraldarynyń jalpy salmaǵy 4 kılodan asty. Qoımashy (skladmen) qylmystyq shemadaǵy negizgi býyn bolyp esepteledi. Olar ınternet-dúkendi uıymdastyrýshylar men esirtkini tikeleı taratýshylar (jasyryn salýshy) arasyndaǵy aralyq baılanysty júzege asyrady. Onyń qyzmetine esirtkiniń iri partııalaryn qabyldaý, saqtaý jáne keıinnen ótkizý úshin olardy úlestirý arqyly zańsyz esirtki bıznesiniń logıstıkasyn qamtamasyz etý kiredi.
— Esirtki quqyq buzýshylyqtaryn jasaǵany úshin 75 adam ustaldy. Onyń ishinde sıntetıkalyq esirtki quraldaryn taratqany úshin 10 jasyryn salýshy ustaldy. Medıtsınalyq emes maqsatta esirtki qoldanǵany úshin Ákimshilik quqyq buzýshylyq týraly kodeksiniń 440-1-babyna sáıkes 297 adam ákimshilik jaýapkershilikke tartyldy. Jyl basynan beri esirtki jáne onyń jarnamalaryn taratý boıynsha 1 242 esirtki saıty buǵattaldy. Sonymen qatar 1 671 jeke tulǵanyń banktik esepshottaryna shekteý qoıyldy. 6 mln 060 myń teńgege sotpen tyıym salyndy, — dep qosty Baǵdat Túgelov.
Eske sala keteıik, budan buryn BQO-da 1 mlrd teńgelik esirtki shemasy áshkerelenip, 11 kúdikti anyqtalǵanyn jazǵan edik.
