BQO-da esirtki zattaryn taratýmen aınalysqan qylmystyq top ustaldy

ORAL. KAZINFORM – Batys Qazaqstan oblysynda bıylǵy bes aıda esirtkige qatysty 110 quqyq buzýshylyq anyqtaldy.

BQO polıtsııa departamenti esirtki qylmysyna qarsy is-qımyl basqarmasynyń aǵa jedel ýákili, polıtsııa podpolkovnıgi Baǵdat Túgelovtiń óńirlik kommýnıkatsııalar qyzmeti alańynda ótken brıfıngide málim etkenindeı, sonyń ishinde 45-i – qylmys, 65-i – teris qylyq.

Baǵdat Amanjolulynyń sózine qaraǵanda, 25 esirtki satý, 2 asa iri kólemde saqtaý, 10 esirtki ósimdikterin ósirý jáne 7 kontrabanda deregi tirkeldi. Zańsyz aınalymnan 19 kg 630 gramm esirtki zattary tárkilendi.

– Jyl basynan beri basqa óńirlerden esirtki zattaryn tasymaldaýdyń 2 arnasyna tosqaýyl qoıyldy. Al 27 mamyr kúni oblys aýmaǵynda esirtki zattaryn taratýmen aınalysqan 6 qatysýshydan quralǵan uıymdasqan qylmystyq top ustaldy, nátıjesinde 2 ınternet-dúkeni joıyldy, - dedi B.Túgelov.

Onyń aıtýynsha, esirtki ósimdikterin ósirý boıynsha 8 zerthana anyqtaldy. Oǵan qosa sıntetıkalyq esirtki zattaryn óndiretin esirtki zerthanasyn anyqtaý boıynsha is-sharalar júrgizilýde. 

– Esirtki quqyq buzýshylyqtary úshin 80 adam qolǵa tússe, onyń 22-si esirtki zattaryn satý boıynsha, sonyń nátıjesinde zańsyz aınalymnan 840,42 gramm sıntetıkalyq esirtki zattary men 16 keliden astam marıhýana tárkilendi. Bul ótken jylǵy osy kezeńmen salystyrǵanda, úsh ese kóp. Jyl basynan beri esirtki jáne onyń jarnamalaryn taratý boıynsha 552 esirtki saıty buǵattaldy. Sonymen qatar 813 adamnyń banktik esepshottaryna (jalpy somasy 39 mln 915 myń teńge) shekteý qoıyldy jáne 28 mln 17 myń 445 teńgege sotpen tyıym salyndy, - dedi B.Túgelov.

Eske sala keteıik, budan buryn Oralda úsh prıtonnyń áreketi áshkerelengenin jazǵan bolatynbyz.