BQO-da erlikpen qaza tapqan saqshynyń qurmetine eskertkish taqta ornatyldy
ORAL. QazAqparat - QR polıtsııasynyń 25 jyldyǵyna jáne erlikpen qaza tapqan mılıtsııa kapıtany Saıyn Ahmetqalıevtiń 80 jyldyǵyna oraı Tasqala aýdandyq ishki ister bóliminiń ǵımaratyna eskertkish taqta ornatyldy, dep habarlaıdy «QazAqparat» tilshisi.
BQO ishki ister departamentiniń baspasóz qyzmetinen túsken málimetke qaraǵanda, Saıyn Ahmetqalıev ishki ister organdaryndaǵy eńbek jolyn 1964 jyly bastap, 1967-1979 jyldary Kamen (qazirgi Tasqala) aýdandyq ishki ister bóliminde tergeýshi, kezekshi-ınspektor bolyp qyzmet etken. 1979 jyly 21 qyrkúıekte qyzmettik mindetin oryndaý kezinde batyldyq ári qaısarlyq tanytyp, qylmyskerdiń qolynan pyshaq jaraqatynan qaza tapty.
Kúni búgin Tasqala aýylyndaǵy bir kóshege S.Ahmetqalıevtiń esimi berilgen. 2015 jyly ashylǵan BQO ishki ister organdarynyń qyzmettik mindetin oryndaý kezinde qaza bolǵan qyzmetkerlerine arnalǵan memorıaldyq keshenge de aty-jóni jazyldy.
«Ómirin Otan qorǵaý, oǵan qyzmet etýge arnaǵan mılıtsııa kapıtany Saıyn Ahmetqalıevtiń antyna beriktigi, batyrlyǵy keıingi urpaqqa úlgi bolyp qala bermek. Eger ol tiri bolǵanda, 20 mamyrda 80 jasqa tolar edi», dedi eskertkish taqtanyń ashylý rásiminde BQO ІІD bastyǵynyń orynbasary, polıtsııa polkovnıgi Talǵat Rahmetov.
Saltanatty sharaǵa aýdan ákiminiń mindetin atqarýshy Azamat Safımalıev, marqumnyń tuıaqtary, qyzy Aıgúl men uly Baqytjan qatysty. Olardyń ekeýi de Astana qalasynda mamandyqtaryna sáıkes eńbek etýde. Áke jolyn qýǵan Baqytjan - podpolkovnık, QR Qorǵanys jáne aeroǵarysh ónerkásibi mınıstrliginde áskerı polıtsııa qyzmetin atqarýda.
