BQO-da erli-zaıyptylardy óltirgen turǵyndarǵa úkim shyqty
ORAL. QazAqparat – Batys Qazaqstan oblysynda erli-zaıyptylardy óltirgen turǵyndarǵa úkim shyqty, dep habarlaıdy QazAqparat tilshisi.
BQO polıtsııa departamentiniń baspasóz qyzmeti málim etkenindeı, A.Chernıakov pen V.Kolyvanov aıypty dep tanyldy.
BQO qylmystyq ister jónindegi mamandandyrylǵan aýdanaralyq sotynyń úkimimen A.Chernıakov 23, sybaılasy 18 jylǵa bas bostandyǵynan aıyryldy. Olar jazalaryn qaýipsizdigi barynsha joǵary qylmystyq-atqarý júıesi mekemesinde óteıtin bolady.
Oblystyq polıtsııa departamenti krımınaldyq polıtsııa basqarmasynyń jeke tulǵaǵa qarsy qylmysty ashý jónindegi bólim bastyǵy, polıtsııa podpolkovnıgi Rýslan Ýsıevtiń aıtýynsha, 3 sáýir kúni Báıterek aýdany polıtsııa bólimine órtenip ketken Volkswagen Jetta avtokóliginiń tabylǵany jóninde habar túsken.
Tekserý barysynda avtokóliktiń Úlken Shaǵan aýylynyń turǵyny Pavel Chırkovqa tıesili ekendigi, onyń azamattyq nekede turatyn áıeli Irına Hanmen birge joǵalyp ketkeni belgili boldy.
Keıin jedel izdestirý sharalary men birqatar saraptamalar nátıjesinde V.Kolyvanov pen A.Chernıakov ustaldy. Olardyń jaýabyna qaraǵanda, 26 naýryz kúni Kolesov aýylynda A.Chernıakovtiń ákesiniń úıinde bolǵan. Sodan keıin P.Chırkov, I.Hanmen aralarynda urys-keris týyndap, erli-zaıyptylardy uryp-soqqan. Sosyn jábirlenýshilerdi es-tússiz halde P.Chırkovtyń avtokóligimen Shaǵannyń jaǵasyna aparyp, kúrekpen urýyn jalǵastyrǵan. Ólgenderine kózderi jetkennen keıin olardy kómip tastap, avtokólikti órtep jibergen.
R.Ýsıevtiń sózine qaraǵanda, bıylǵy toǵyz aıda óńirde 23 kisi óltirý deregi tirkelip, sonyń 22-si boıynsha qylmystyq is sotqa joldanǵan. Ashylý deńgeıi 91,7 paıyzdy qurap otyr.
Eske sala keteıik, sáýir aıynda osy qylmys boıynsha BQO-da eki adamdy óltirdi degen kúdikpen 2 turǵyn ustalyp, keıin olardyń qamaýǵa alynǵanyn jazǵan bolatynbyz.
