BQO-da erigen qar sýy joldyń ústine shyǵyp ketti
ORAL. QazAqparat - Batys Qazaqstan oblysynda erigen qar sýy joldyń ústine shyǵyp ketti, dep habarlaıdy QazAqparat tilshisi.
Bókeı ordasy aýdany ákiminiń orynbasary Rústem Zulqashevtiń aıtýynsha, oqıǵa keshe tústen keıin aýdan ortalyǵy Saıqyn aýylynan 91 shaqyrym jerde, Bısen aýyldyq okrýgi aýmaǵynda oblystyq mańyzy bar Chapaev-Jańaqala-Bısen joly boıynda oryn aldy.
Qar qatty erigendikten, jol asty qubyrynan ótip úlgermedi me, sý eki saǵattaı joldyń ústimen ótken. Biraq odan jol qatynasyna asa bir qaýip tóne qoıǵan joq. Keshe keshkisin baryp qaraǵan mezgilde joldy jabý qajetsiz dep tabyldy. Qazirgi kezde avtokólikter toqtaýsyz ótip jatyr.
