BQO-da er adamdy júk kóligimen qaǵyp, qashyp ketken sheteldik júrgizýshi ustaldy
ORAL. QazAqparat – Batys Qazaqstan oblysynda er adamdy júk kóligimen qaǵyp, qashyp ketken sheteldik júrgizýshi ustaldy, dep habarlaıdy QazAqparat tilshisi.
BQO polıtsııa departamentiniń baspasóz qyzmeti málim etkenindeı, oqıǵa 9 aqpan kúni shamamen saǵat 20.45-te Samara-Shymkent kúre joly boıynda Báıterek aýdany Mıchýrın aýyly tusynda boldy.
Qyrǵyzstandyq D. degen azamat DAF júk kóligimen belgilenbegen jerden joldan ótip bara jatqan 33 jasar er adamdy qaǵyp ketip, oqıǵa ornynan boı tasalaǵan.
Alǵan jaraqattary saldarynan jaıaý júrginshi oqıǵa ornynda qaza tapty. Múrdesi sot-medıtsınalyq saraptamaǵa jiberildi.
Oqıǵany kórgen áıel adam dereý polıtsııaǵa habarlaǵan. Sonyń jáne polıtsııa qyzmetkerleriniń jedel is-áreketi nátıjesinde júrgizýshi qylmystyń izi sýymaı ustaldy.
Qazirgi kezde QR QK 345-baby 3-bóligine (abaısyzda adam ólimine ákep soqqan jol júrý erejesin buzý) jáne 347-babyna (jol-kólik oqıǵasy bolǵan jerden ketip qalý) sáıkes qylmystyq is qozǵalyp, sotqa deıingi tergeý amaldary júrgizilýde.
Sol kúni taǵy bir oqıǵa Oral qalasynda oryn aldy. Kólik quralyn júrgizýge quqyǵy bolmasa da, rýlge otyrǵan 28 jastaǵy júrgizýshi shamamen saǵat 18.50-de T.Masın men S.Daýmov kósheleriniń qıylysynda rettelmeıtin jaıaý júrginshi ótkelinen ótip bara jatqan 30 jastaǵy áıeldi qaǵyp ketti.
Túrli jaraqat alǵan áıel aýrýhanaǵa jatqyzyldy.
Bul derek boıynsha QR QK 345-baby 2-bóligine sáıkes (abaısyzda adamnyń densaýlyǵyna aýyr zııan keltirýge ákep soqqan jol júrý erejesin buzý) tergeý amaldary júrgizilýde.
