BQO-da er adam kópirden sekirmek bolǵan

ORAL. QazAqparat - BQO polıtseıleri kópirden sekirmek bolǵan er adamdy qutqaryp qaldy, dep habarlaıdy QazAqparat Polisia.kz-ke silteme jasap.

20 tamyz kúni saǵat 21:30-da Oral qalasy PB kezekshi bólimine belgisiz er adamnyń Jaıyq ózeni arqyly ótetin avtomobıl kópirinen óz-ózine qol jumsamaq bolyp, qulaıyn dep turǵany jóninde habarlama kelip túsken. Osy ýaqytta jaqyn jerde qyzmettik babyn ótkerip júrgen patrýldik polıtsııa qyzmetkerleri Jiger Ahonov pen Qaırat Dlımov oqıǵa ornyna kelip, er adamdy aman alyp qalýǵa qajetti sharalardy jasaǵan.

Patrýldik polıtsııa qyzmetkerleri 1 saǵattan astam ýaqyt boıy er adammen sóılesip, keıin raıynan qaıtaryp, qaýipti aımaqtan shyǵarǵan. Polıtseıler er adamdy tynyshtandyryp, Oral qalasynyń PB-ǵa jetkizgen.

Anyqtalǵandaı, Terekti aýdanynyń 29 jastaǵy turǵyny mas kúıde bolǵan. Ol óziniń mundaı is-áreketke barý sebebin qyzymen arasynda bolǵan janjaldyń kesirinen dep túsindirgen. Alaıda polıtseılerdiń kásibı sheberligi arqasynda er azamat aman qalǵan.

Turǵynǵa qatysty QR ÁQBtK-niń 440-baby 1-bóligi (Alkogoldik ishimdikterdi ishý nemese qoǵamdyq oryndarda mas kúıinde bolý) boıynsha ákimshilik hattama jasaldy. Er adam Oral qalasynyń ýaqytsha beıimdeý jáne detoksıkatsııa ortalyǵyna ornalastyryldy.