BQO-da energetıkalyq jáne kommýnaldyq salada 6 jobany júzege asyrý kózdelip otyr
ORAL. KAZINFORM — Batys Qazaqstan oblysynda «Jaıyqjylýqýat» AQ, «Batys sý arnasy» JShS jáne «Batys Qazaqstan aımaqtyq elektr jelilik kompanııasynyń» negizgi jabdyqtarynyń tozyǵy jetip tur.
BQO energetıka jáne turǵyn úı-kommýnaldyq sharýashylyq basqarmasy basshysynyń orynbasary Qanat Ómirálıevtiń óńirlik kommýnıkatsııalar qyzmeti alańynda ótken brıfıngide Oral qalasynda jylý-qýat jelileriniń uzyndyǵy 20 531 km bolsa, sonyń 16 249-y nemese 79,14 paıyzy tozǵan. Sol sekildi 248,6 km jylý jelisiniń 50,1 paıyzy (124,6 km), 483,5 km sýmen jabdyqtaý jelisiniń 60,5 paıyzy (292,5 km), 377,4 km sý burý qubyrynyń 61,3 paıyzy (231,4 km) tozǵan.
Qanat Amangeldiulynyń sózine qaraǵanda, bıyl BQO-da alty jobany júzege asyrý úshin bıýdjetten 1,453 mlrd teńge qarastyryldy. Osy qarjyǵa Oral qalasynda jer asty sýlary ken ornyn, 1 myń mm sý qubyry jáne № 29 káriz-sorǵy stantsııasyn qaıta qurý, 5 uńǵyma burǵylaý, sondaı-aq Krýgloozernyı men Zachagan kentinde eskisiniń ornyna jańa bloktik-modýldik qazandyq salý kózdelip otyr.
— Sonymen qatar Oral qalasy jylý-qýat ortalyǵynyń № 1 týrbınalyq qondyrǵysy iske qosylsa, óndiriletin elektr energııasy 12 MVt-ǵa ulǵaıady. Bıyl kásiporyndardyń ınvestıtsııalyq baǵdarlamasy aıasynda 310,7 km ınjenerlik jeli, 22 qosalqy stantsııa, 114 transformatorlyq qosalqy stantsııany jóndeý qolǵa alynbaq, — dedi Q.Ómirálıev.
Onyń aıtýynsha, 2024 jyly «Energetıkalyq jáne kommýnaldyq sektorlardy jańǵyrtý» ulttyq jobasy bekitilgen bolatyn. Osyǵan oraı Batys Qazaqstan oblysy ákimdigimen «Turǵyn úı-kommýnaldyq sharýashylyqty jańǵyrtý jáne damytýdyń qazaqstandyq ortalyǵy» AQ-ǵa sý burý, sýmen jabdyqtaý jobalary boıynsha «Batys sý arnasy» JShS-dan 4 jáne jylýǵa baılanysty «Jaıyqjylýqýat» AQ tarapynan 5 joba usynyldy.
Oǵan qosa 2025-2029 jyldary «Energetıkalyq jáne kommýnaldyq sektorlardy jańǵyrtý» ulttyq jobasy aıasynda elektr jelilerin qaıta jańartý jobalaryn iske asyrýǵa atalmysh AQ-ǵa 27,8 mlrd teńgege 11 joba joldandy.
Eske sala keteıik, budan buryn aqyn Oral qalasynda jylý qubyrlary jóndele bastaǵanyn jazǵan edik.