BQO-da eńbek ınspektorlarynyń tekserýi nátıjesinde 225 zańbuzýshylyq anyqtaldy
ORAL. KAZINFORM – Batys Qazaqstan oblysynda 2025 jyly azamattardyń ótinishteri, sondaı-aq quqyq qorǵaý jáne memlekettik organdardyń talaptary negizinde memlekettik eńbek ınspektorlary 186 kásiporyn men uıymǵa tekserý júrgizdi.
BQO boıynsha eńbek ınspektsııasy departamentiniń basshysy Asylulan Dosjanovtyń óńirlik kommýnıkatsııalar qyzmeti alańynda ótken brıfıngte málim etkenindeı, bul 2024 jylǵydan (117) 37 paıyzǵa kóp.
Asylulan Tursynulynyń sózine qaraǵanda, tekserý barysynda 225 zańbuzýshylyq anyqtalsa (2024 jyly – 137), sonyń ishinde 207-si (2024 jyly – 130) – eńbek qatynastary, 17-si (7) – eńbekti qorǵaý jáne qaýipsizdik, bireýi (0) halyqty jumyspen qamtý salasynda tirkelgen.
- Anyqtalǵan barlyq zańbuzýshylyqtar boıynsha 144 nusqama (2024 jyly – 96) berilip, jalpy somasy 16,927 mln teńge (2024 j. – 12,728 mln teńge) bolatyn 72 aıyppul salyndy (2024 jyly 53 eskertý shyǵarylǵan). Sondaı-aq prokýratýra, memlekettik kirister organdarynyń, eńbek ınspektsııasynyń jáne jeke sot oryndaýshylary palatasynyń birlesken jumysynyń nátıjesinde 2025 jyly 33 kásiporynda jalaqy boıynsha bereshek 974,216 mln teńge somasynda óteldi. 7689 jumyskerdiń quqyqtary qorǵalyp, bul eńbek daýlary men janjaldarynyń aldyn alýǵa yqpal etti, - dedi A.Dosjanov.
Departament basshysynyń aıtýynsha, 2025 jyly 29 jazataıym oqıǵa tirkeldi, bul 2024 jylmen (56) salystyrǵanda 48 paıyzǵa tómen, sonyń ishinde altaýy – toptyq jazataıym oqıǵa (2024 jyly – 8). Barlyǵy 37 adam zardap shekti, bul 2024 jylǵydan (68) 45 paıyzǵa az. Sonyń ishinde 25-i (2024 jyly – 42) aýyr jaraqat alsa, ekeýi (6) qaza tapty. Ólimmen aıaqtalǵan eki jazataıym oqıǵa da qyzmetkerlerdiń bıiktikten qulaýy saldarynan oryn alǵan.
Eske sala keteıik, budan buryn Batys Qazaqstanda óndiristegi jazataıym oqıǵadan 8 adam zardap shekkenin jazǵan edik.
Sondaı-aq BQO-da eki malshynyń boranda úsip ólýine baılanysty qylmystyq is qozǵaldy.