BQO-da Eńbek Eri Vardan Chamchııannyń 100 jyldyǵy atalyp ótti
ORAL. QazAqparat - Zelenov aýdany Shalǵaı aýylynda Sotsıalıstik Eńbek Eri Vardan Shnorkovıch Chamchııannyń 100 jyldyǵy atalyp ótti, dep habarlaıdy QazAqparat.
Vardan Chamchııannyń esimi Qazaqstandaǵy tyń ıgerý naýqanymen tikeleı baılanysty. 1954 jyly osynda alǵashqy tyń ıgerýshiler qatarynda kelgen ol «Perm» keńsharynda bas agronom boldy. Arada úsh jyl ótkennen keıin keńshar dırektorlyǵyna aýysqan ol osy qyzmetti 22 jyl boıy abyroımen atqardy. Ásirese, ol bilikti agronom retinde egin sharýashylyǵynyń alǵa basýyna súbeli úlesin qosyp, keńshardaǵy egistik kólemin 40 myń gektardan asyrdy. Egin men mal sharýashyǵynan mol ónim alýdy qamtamasyz etýmen birge kóptegen turǵyn úı, áleýmettik nysandar salǵyzdy. Osyndaı zor tabystary úshin oǵan 1966 jyly Sotsıalıstik Eńbek Eri ataǵy berildi.
Eńbek Eriniń 100 jyldyǵyna oraı aýyldaǵy ortalyq saıabaqta músini ornatylyp, ol saltanatpen ashyldy. Onyń ashylý rásimine qatysqan aýdan ákimi Kárim Jaqypov Vardan Chamchııandaı eńbek maıtalmandarynyń isi búgingi tańda da jalǵasyp, bıyl Táýelsizdiktiń 25 jyldyǵy qarsańynda aýdan eginnen mol ónim alyp otyrǵanyn atap ótse, shara barysynda V.Chamchııannyń uly Sergeı Chamchııan, eńbek ardageri Ǵalınur Shamshaeva, osy óńirdiń túlegi, ǵalym, Oraldaǵy «KazIITÝ» ǵylymı-bilim kesheniniń quryltaıshysy Aqserik Áıtimov jáne basqalar estelikterimen bólisti. Óńirdegi armıan etnomádenı birlestiginiń tóraǵasy, oblystyq máslıhattyń depýtaty Avetık Amırhanıan armıan halqynyń dańqty ulyna kórsetilgen qurmet úshin rızashylyǵyn bildirdi.
Budan keıin mereıtoıǵa kelgender aýyldyq klýbta Vardan Chamchııanǵa arnalǵan kitap kórmesimen tanysyp, kontserttik baǵdarlamany tamashalady.
