BQO-da eńbek ardageri zamanaýı aýdandyq emhana úshin Prezıdentke alǵysyn bildirdi
Batys Qazaqstan oblysy Terekti aýdanynyń ortalyǵy Fedorovka aýylynda jańa aýdandyq emhana ashyldy. Atalǵan joba memleket basshysynyń «Aýylda densaýlyq saqtaýdy jańǵyrtý» pılottyq ulttyq jobasy aıasynda júzege asyryldy.
Ashylý saltanatyna Batys Qazaqstan oblysynyń ákimi Narıman Tóreǵalıev qatysyp, aýyl turǵyndaryn emhananyń ashylýymen quttyqtady.
«Memleket basshysy Qazaqstan halqyna arnaǵan bıylǵy Joldaýynda «Elimizdiń basty qundylyǵy – adam. Ult densaýlyǵy jaqsy bolsa ǵana, qoǵam ornyqty damıdy» – dep atap ótken bolatyn. Ashylyp otyrǵan jańa emhana aýyl turǵyndarynyń ıgiligine qyzmet etedi dep senemin. Jerlesterimiz sapaly jáne qoljetimdi medıtsınalyq qyzmet alatyn bolady»,– dedi oblys ákimi Narıman Tóreǵalıev.
Terekti aýdanynyń eńbek ardageri Vasılıı Savchenko aýdan ortalyǵynda zamanaýı úlgide salynǵan emhana úshin Memleket basshysyna rızashylyǵyn jetkizdi.
«Sońǵy eki jylda oblysymyzda kóptegen medıtsına nysandary ashyldy. Búgingi emhana ásirese, aýyl turǵyndary úshin qýanyshty jańalyq. Buryndary keıbir medıtsınalyq qyzmet túrlerin alý úshin oblys ortalyǵy baryyp jatatynbyz. Endi mine, eshqaıda shyqpaı-aq, jańa tehnologııalarmen jabdyqtalǵan emhanadan em alatyn boldyq. Prezıdentimizdiń halyq ıgiligi úshin jasaǵan qoldaýyna alǵysymyz sheksiz. Memleket basshysy aýyl turǵyndaryna kóp kóńil bólip otyr. Bıyl sondaı-aq, Oraldan Terekti aýdanynyń ortalyǵy Federovka aýylyna jol tartyldy» -dedi Terekti aýdanynyń qurmetti azamaty Vasılıı Savchenko.
Ǵımarattyń jalpy aýdany - 5626 sh.m. Emhanada saýyqtyrý, sáýlelik dıagnostıka, profılaktıka, fızıo bólimsheleri, laboratorııa, kúndizgi statsıonar jáne áıelder konsýltatsııasy bólimi bar.
Barlyq qajetti medıtsınalyq qural-jabdyqtarmen jabdyqtalǵan: ýltradybystyq apparat, mamograf, 12 arnaly elektrokardıograf, vıdeogastroskop, vıdeokolposkop, zerthanalyq qural – jabdyqtar, kardıohırýrgııalyq baqylaý kesheni, fızıoterapııalyq qural – jabdyqtar, rentgendik keshen, stomotologııalyq qural- jabdyqtar, emdik jattyǵý kesheni jáne kınezoterapııalyq qondyrǵylar bar.
Jańa medıtsınalyq nysan aýdan turǵyndaryna sapaly qyzmet kórsetip, óńirimizdiń densaýlyq saqtaý júıesiniń damýyna serpin bermek.
QR Prezıdentimizdiń tapsyrmasyna sáıkes «Aýylda densaýlyq saqtaýdy jańǵyrtý» pılottyq ulttyq jobasy aıasynda Batys Qazaqstan oblysynda 50 medıtsınalyq nysannyń qurylysy josparlanǵan bolatyn. Ótken jyly 12 jańa medıtsınalyq nysan turǵyndar úshin qoldanysqa berilse, bıylǵy jyly 17 nysan iske qosyldy.
