BQO-da elýge jýyq eldi mekendi aýyz sýmen qamtýǵa 5,7 mlrd. teńge bólindi
Óńir basshysynyń aıtýynsha, Elbasy tapsyrmasyna sáıkes halyqtyń ózekti máselelerin sheshý maqsatynda jyl boıy turǵyndarmen kezdesýler ótkizilip, olardyń usynys-pikirleri tyńdaldy. Sonyń ishinde eń kókeıkesti máseleniń biri osy aýyz sý boldy. Naqty aıtqanda, oblys aýyldarynyń 30 paıyzy ǵana aýyz sýmen qamtylǵan. Osy másele Úkimet tarapynan qoldaý taýyp, aldaǵy jylǵa qomaqty qarjy qaraldy. Sol sekildi 2017 jyly Aqjaıyq, Bókeı ordasy, Jánibek jáne Syrym aýdandarynda 29 aýylǵa gaz qubyry tartylmaqshy. Bul maqsatqa 1,6 mlrd. teńge berildi. Oǵan qosa Oral qalasynda ortalyqtandyrylǵan jylytý júıesine rezervtik gaz qubyryn tartý úshin 2 mlrd. teńge qarastyryldy. Jalpy, qaı sala da nazardan tys qalmaıdy. Mysaly, Oral qalasy men basqa jerlerde halyq sanynyń, ásirese, balalardyń kóbeıýin eskere otyryp, óńirde tórt mektep salý úshin 4,3 mlrd. teńge bólindi. Sondaı-aq sońǵy jyldary qarqyn alǵan jol qurylysy aldaǵy jyly da júrgiziledi. Oral qalasy men aýylishilik joldar óz aldyna, oblystyq jáne aýdandyq mańyzy bar jergilikti joldardy jóndeý úshin 7,6 mlrd. teńge jumsalady. «Nurly jol» baǵdarlamasyna sáıkes Ulttyq qor qarjysy esebinen Oral-Tasqala-RF shekarasy kúre jolyn qaıta salý jalǵasady. Bıyl 215 áleýmettik nysanǵa kúrdeli jóndeý júrgizilse, 2017 jyly Terekti aýdanyndaǵy aýrýhana osyndaı jóndeýden ótedi. Densaýlyq saqtaý mekemelerine 1,2 mlrd. teńgege jańa qural-jabdyq alynbaqshy. Terekti aýdany Podstepnyı aýylynda mádenıet úıin salý úshin 163 mln. teńge bólindi. Ózge de jumystar kezegimen atqaryla bermek.
Sessııada BQO ekonomıka jáne bıýdjettik josparlaý basqarmasynyń basshysy Qaısar Mańqaraevtyń málim etkenindeı, 2017 jylǵa arnalǵan oblystyq bıýdjet túsimder men shyǵystar boıynsha 111,1 mlrd. teńge kóleminde belgilendi. 2017 jylǵa arnalǵan bıýdjet túsimderi 29,4 mlrd. teńge kólemindegi ózindik kiristerden, 47,5 mlrd. teńge jalpy sıpattaǵy transfertter (sýbventsııalar) jáne 33,4 mlrd. teńge maqsatty transfertter men nesıeler negizinde qalyptasty. Halyqty áleýmettik qoldaý, densaýlyq saqtaý men bilim berý, ómir súrý deńgeıin jaqsartý syndy negizgi baǵyttardan bólek turǵyn úı-kommýnaldyq sharýashylyqty damytýǵa 2,4 mlrd. teńge, kólik ınfraqurylymyn damytýǵa 3,6 mlrd. teńge, kásipkerlikti qoldaýǵa 1,4 mlrd. teńge berildi. Oǵan qosa respýblıkalyq bıýdjettiń maqsatty transfertteri men nesıeleri esebinen aýyldyq eldi mekenderde 29 sýmen qamtý nysanyn salý men qaıta qurýǵa 5,3 mlrd. teńge, gaz tasymaldaý ınfraqurylymyn damytýǵa 3,3 mlrd. teńge, Oral qalasynda bastalǵan eki mekteptiń qurylysyn jalǵastyrý men taǵy qos mektepke 4,3 mlrd. teńge, avtokólik joldaryn qaıta qurý men ortasha jóndeýge 4 mlrd. teńge qaraldy.