BQO-da elektr jelileriniń tozýyn azaıtý úshin ne istelip jatyr

ORAL. KAZINFORM — Batys Qazaqstan oblysynda elektr jelileriniń tozýyn azaıtý úshin Zachagan-Peremetnyı, Peremetnyı-Tasqala jáne Chapaev-Pervomaı ýchaskelerinde 110 kV áýe jelilerin aýystyrý jumystary bastaldy. 

BQO energetıka jáne turǵyn úı-kommýnaldyq sharýashylyq basqarmasy basshysynyń orynbasary Murat Qonysbaevtyń málim etkenindeı, osy maqsatqa joba boıynsha 2,8 mlrd teńge bólindi.

Onyń sózine qaraǵanda, sonymen qatar Memleket basshysynyń tapsyrmasyna sáıkes jasaqtalǵan «Energetıkalyq jáne kommýnaldyq sektordy jańǵyrtý» ulttyq jobasy aıasynda bıyl elektrmen jabdyqtaý boıynsha 6 nysannyń qurylysy bastaý aldy. 

— Bıyl bul jobalarǵa barlyǵy 3,5 mlrd teńge baǵyttalmaq. Jobanyń jalpy quny — 10,3 mlrd teńge. Tapsyrys berýshi — «Batys Qazaqstan aımaqtyq elektr jetkizý kompanııasy» JShS. Jalpy, sońǵy úsh jylda quny 13 mlrd teńge 12 joba óz máresine jetti. Sonyń ishinde «Aýyl — el besigi» baǵdarlamasy aıasynda Syrym, Tasqala, Shyńǵyrlaý, Bórli aýdandarynyń 6 aýylynda elektr jelileri qaıta jańartyldy. Oǵan qosa Oral qalasynda «Aqjaıyq» jáne «Juldyz shaǵynaýdanynda 110/10 kV qosalqy stantsııalary, Zachagan kentinde jóndeý-óndiristik bazasy salyndy. „Aqjaıyq“ shaǵynaýdanynda elektr taratý jelileri tartyldy. Sondaı-aq Oral jylý-qýat ortalyǵynda qýaty 12 MVt bolatyn № 1 týrboagregatqa kúrdeli jóndeý júrgizilip, stantsııanyń jalpy elektr energııasyn óndirý qýaty 58 MVt-qa deıin jetkizildi, — dedi M.Qonysbaev.

Onyń aıtýynsha, kúni búgin oblysta elektr jelileriniń tozýy ortasha eseppen alǵanda, 78,8 paıyz bolyp otyr.

Eske sala keteıik, budan buryn Batys Qazaqstanda energetıkalyq qaýipsizdikti qalaı qamtamasyz etýge bolatynyn jazǵan edik.