BQO-da elektr jelileriniń 82 paıyzy tozǵan
BQO energetıka jáne turǵyn úı-kommýnaldyq sharýashylyq basqarmasynyń basshysy Mırjan Nurtazıevtiń óńirlik kommýnıkatsııalar qyzmeti alańynda ótken brıfıngte málim etkenindeı, 1 qarashadan bastap óńirde qardyń kóp túsýine jáne kúshti jelge baılanysty elektr jelileri jıi úzildi.
Onyń sózine qaraǵanda, Oral qalasy men oblystyń alty aýdanynda kesheden beri 7 myńdaı abonent elektr jaryǵynsyz qaldy.
2 qarasha kúngi saǵat 11.00-degi málimet boıynsha, 5764 abonent jaryqsyz otyr. Atap aıtqanda, Oral qalasynda 1900, Terekti aýdanynda 1250, Syrymda 745, Bórlide 1869 abonent elektr jelisinen ajyratylǵan.
«Qazirgi tańda oblysta qalpyna keltirý jumystaryna 35 arnaıy tehnıka tartylǵan. 28 brıgada quramynda 92 adam jumys isteýde», - dedi QazAqparat tilshisine M.Nurtazıev.
Atalǵan basqarma málimetine qaraǵanda, «Batys Qazaqstan elektr jelilerin taratý kompanııasy» JShS barlyǵy 20 305 km elektr jelisi boıynsha qyzmet kórsetedi. Orta eseppen elektr jelileri men qosymsha stansalardyń 82 paıyzy tozǵan. Sonyń saldarynan, sondaı-aq aýa raıyna baılanysty bıylǵy toǵyz aıda 266 apattyq úzilý tirkelgen.
BQO áleýmettik-ekonomıkalyq damýynyń 2023-2025 jyldarǵa arnalǵan keshendi josparyna sáıkes 2019,5 km elektr jelisin jóndeý kózdelgen. Sonda elektr jelileriniń tozýy 62 paıyzǵa deıin tómendeıdi. Osy maqsatqa 2023-2025 jyldary jergilikti jáne respýblıkalyq bıýdjetten 20 mlrd teńge bólý josparlanýda.
Eske sala keteıik, budan buryn Oral qalasynda alǵashqy qar jaýǵanyn, 6 myńnan astam abonent elektr jaryǵynsyz qalǵanyn jazǵan bolatynbyz.