BQO-da elektr baǵandarynyń qulaýy saldarynan eki aýyl jaryqsyz qaldy

ORAL. KAZINFORM – Batys Qazaqstan oblysy 6 maýsym kúni kúshti jeldiń saldarynan elektr baǵandary qulap, Aqjaıyq, Syrym, Terekti aýdandarynyń 10 aýyly (1 435 jeke turǵyn úı, 25 áleýmettik nysan) jaryqsyz qaldy.

BQO TJ departamentiniń baspasóz qyzmetinen málim etkenindeı, 9 maýsym kúngi saǵat 20.00-degi málimet boıynsha Syrym aýdanynda Araltóbe (50 abonent, 2 áleýmettik nysan), Bulan (176 abonent, 7 áleýmettik nysan), Óleńti (100 abonent, 2 áleýmettik nysan), Taldybulaq (46 abonent, 1 áleýmettik nysan), ishinara Alǵabas (43 abonent, 3 áleýmettik nysan) eldi mekenderinde, sondaı-aq Terektide Aqsoǵym aýylynda (531 abonent, 4 áleýmettik nysan) elektr jaryǵy qalpyna keltirildi.

«Qazirgi kezde Syrym aýdanynda Alǵabas eldi mekeninde 19 abonent, Terektide Úlken Eńbek aýylynda 385 abonent, 3 áleýmettik nysan jaryqsyz qalyp otyr. Qalpyna keltirý jumystary júrgizilýde», dep habarlady vedomstvodan.

Departament málimetine sáıkes sonymen qatar 6 maýsym kúni oblystyń alty aýdanynda 25 eldi mekende ekpini sekýndyna 14-ten 18 metrge deıin jetken kúshti jel 67 jeke turǵyn úı, 14 qora-qopsy, 18 áleýmettik nysannyń shatyryn julyp áketti. Oqıǵa oryndarynda jergilikti atqarýshy organdardyń komıssııalary jumys jasap jatyr.

Eske sala keteıik, budan buryn BQO-da salynyp jatqan úıdiń qabyrǵasy qulap qalýyna baılanysty aýdan ákimi men basqarma basshysyna eskertý jarııalanǵanyn jazǵan bolatynbyz.