BQO-da eldi mekenderdi sý basý qaýpi seıilgen joq – TJD bastyǵy
ORAL. QazAqparat – Batys Qazaqstan oblysynda eldi mekenderdi sý basý qaýpi seıilgen joq, dep habarlaıdy QazAqparat tilshisi.
BQO TJD bastyǵy, general-maıor Jasulan Jumashevtiń óńirlik kommýnıkatsııalar qyzmeti alańynda oblystyń ózenderi men sý qoımalarynda sý jınalyp jatqandyqtan, Oral qalasy, Tasqala, Terekti, Bórli, Shyńǵyrlaý jáne Báıterek aýdandarynda áli qaýip bar ekendigin málim etti.
Al qalǵan aýdandarda sý basý qaýpi tómen.
Jasulan Qydyrǵojaulynyń sózine qaraǵanda, Reseıdiń Saratov jáne Orynbor oblystarynan transshekaralyq ózenderdiń jaı-kúıi týraly kúnbe-kún aqparat alynýda.
«Prıvolje gıdrometeorologııa jáne qorshaǵan ortany qorǵaý basqarmasy» federaldyq memlekettik bıýdjettik mekemesiniń boljamy boıynsha bıyl Jaıyq ózeni tasyǵan kezde sý deńgeıi Oral men Kóshim beketi tusynda 400-500, Taıpaq aýyly mańynda 350-450 santımetrge (qaýipti deńgeı – 850 sm) kóterilýi yqtımal. Seń 7-13 sáýir aralyǵynda júrýi múmkin.
Oblysta barlyǵy 59 gıdrotehnıkalyq qurylym bolsa, sonyń 28-i respýblıkalyq, 28-i kommýnaldyq, úsheýi jeke menshikke jatady. Tekserý qorytyndysyna sáıkes 15 gıdroqurylym jóndeý men qalpyna keltirýdi qajet etedi.
Kúni búginge deıin eldi mekenderden 984 myńnan astam tekshe metr qar shyǵarylyp, 90 myńnan astam tekshe metr sý soryldy.
Muz keptelisi bolmas úshin Jaıyq, Derkól, Shaǵan ózenderinde 91 myńnan astam tekshe metr muz oıylyp, 5 myńnan astam oıyq burǵylandy.
Oblys joldaryndaǵy 1578 turba tolyqtaı tazartyldy. Joldarda sý basyp ketýi múmkin 46 jer anyqtalyp, baqylaýǵa alyndy.
7 sáýirden bastap TJ departamenti qyzmetkerleri kúsheıtilgen rejımge kóshirildi. Sý tasqyny kezinde kúsh-quraldardan 2591 adam, 734 tehnıka, 45 júzý quraly, 295 motopompa tartylmaqshy. Oblys boıynsha 170 evakýatsııalyq qosyn ázirlendi.
«Óńirde tótenshe jaǵdaılardy joıý úshin rezervte 1,5 mlrd teńge qarastyryldy. Kúni búgin 443 tonna janar-jaǵar maı, 88 myń qap, 22 myń tonna ınertti materıaldar daıyndaldy. Jarýshylar brıgadasyn tartý úshin 6,820 mln teńgege, aerovızýaldy zertteý júrgizýge ushaqqa 16,7 mln, qap alý úshin 2,895 mln teńgege kelisimshart jasaldy», dedi J.Jumashev.
Eske sala keteıik, budan buryn BQO-da turǵyn úılerdi sý basý qaýpi týyndaǵanyn jazǵan bolatynbyz.
