BQO-da Elbasy Joldaýyna sáıkes is-sharalar jospary belgilendi
Jıynda baıandama jasaǵan oblys ákimi Altaı Kólginov Memleket basshysynyń Joldaýyna baılanysty óńirde atqarylar negizgi jumystardy atap kórsetti.
Oblysta halyq tutynatyn taýarlar men et eksportyn ulǵaıtý, ırrıgatsııalyq qurylymdar júıesin jańartý, ıgerilmegen jerlerdi keri qaıtaryp, ony qolynan is keletin azamattarǵa berý jumystary jalǵasady.
Memleket tarapynan 500 mlrd teńge óńdeý ónerkásibine baǵyttalmaqshy. Bul - úlken múmkindik. Oblysta 12 ınvestıtsııalyq joba, sonyń ishinde teń jartysy sheteldik qarjynyń qatysýymen júzege asyrylýda. Buǵan tikeleı ınvestıtsııalar qory septesetin bolady.
Elbasy agroónerkásip kesheni múmkindigin tolyǵymen paıdalaný mindetin qoıdy. «Kýbleı», «Jaıyq Agro», «Batys Nyq», «Jelaev astyq ónimderi kombınaty» qazirgi zamanǵy tehnologııalar boıynsha jumys jasaýda. Brıtandyq «Danbıa» kompanııasy óńirge (mal bordaqylaý keshenine) qarjy quıýǵa daıyn. Munyń bári shetelge, sonyń ishinde Qytaıǵa kóbirek ónim jóneltýge múmkindik beredi.
Oblys aktıviniń jıynynda sóz alǵan «Stroıkombınat» JShS dırektory Baqytjan Nurbaev Elbasy aıtqan bastamalardyń tarıhı mańyzy bar ekendigin, olardy júzege asyrý úshin kóp bolyp jumyla bilýdiń qajettigin jetkizdi.
«Joldaýda eń tómengi jalaqyny kóterý týraly aıtylǵany málim. Osy oraıda «Stroıkombınat» JShS aldaǵy jyldyń 1 qańtarynan jalaqyny ósirý jóninde sheshim qabyldady. Bul tsıfrlyq tehnologııany engizý, eńbek ónimdiligin arttyrý esebinen múmkin bolmaq. Osy maqsatta kásiporynǵa shet elden qazirgi zamanǵy jabdyqtar, avtomattandyrylǵan jelini satyp alýdamyz. Biz Elbasy tarapynan otandyq ónim óndirýshilerdi qoldaýdy únemi sezinip otyramyz. Qazirgi kezde biz oblysty temirbeton buıymdarymen barynsha qamtýdamyz. «7-20-25» baǵdarlamasyn júzege asyrýǵa da qatysýdamyz. Aldaǵy ýaqytta da básekege qabiletti sapaly ónimder óndirýge baǵyt ustaıtyn bolamyz», dedi B.Nurbaev.
«Memleket basshysy bizderdiń, muǵalimderdiń aldyna da úlken mindetter qoıyp otyr. Joldaýda ustazdar qaýymyna qatysty aıtylǵan janashyrlyq sózder bizderdi jigerlendirdi. Qazirgi tańda bilim ordalarynda Nazarbaev zııatkerlik mektepteri úlgisinde oqý úderisine ózgerister engizilýde. Bul quptarlyq qadam der edim. Elbasynyń, ásirese, «Pedagogtar mártebesi týraly» Zańdy jasaýǵa tapsyrma bergeni qatty qýantty. Jekelegen erejeler bolmasa, mundaı zań eshbir elde joq eken. Endi, mine, bizdiń qyzmetimizdiń bári zańmen dárejelenetin bolady», dedi Oral qalasyndaǵy №17 orta mektep dırektory Tamara Rýdıch.
Jıynda sondaı-aq «Medıtsına ortalyǵy» JShS dırektory Rafhat Istaev, Aqjaıyq aýdany «Sábıt» sharýa qojalyǵynyń jetekshisi Erbolat Qurmanǵalıev, bókeıordalyq jas kásipker Saıan Baetov Joldaýdy qýattaıtyndyqtaryn aıtyp, óz usynys-tilekterin bildirdi.
