BQO-da «Elbasy medali» jobasyna qatysýǵa 400-ge jýyq adam tilek bildirdi
ORAL. QazAqparat – Batys Qazaqstan oblysynda «Elbasy medali» respýblıkalyq jobasyna qatysýǵa 400-ge jýyq adam tilek bildirdi. Bul týraly brıfıngte oblystyq bilim basqarmasy basshysynyń mindetin atqarýshy Záýre Ǵumarova málim etti, dep habarlaıdy QazAqparat tilshisi.
Onyń aıtýynsha, aldaǵy ýaqytta ótinish berýshilerdiń sany budan da artatyn bolady.
Óskeleń urpaqty tárbıeleýge jáne olardyń úılesimdi jetilýine múmkindik beretin «Elbasy medali» baǵdarlamasyna qatysý tártibi Úkimet qaýlysymen bekitilip, Tuńǵysh Prezıdent – Elbasy qorynyń qoldaýymen ótip jatyr.
Ár qatysýshyǵa jeti baǵyt usynylǵan. Olar: sport jáne dene shynyqtyrý, daryn men daǵdy, eriktilik, týrıstik saıahattar, kitap oqý, ulttyq mura jáne eńbek tájirıbesi.
Z.Ǵumarovanyń sózine qaraǵanda, baıqaýǵa 14 pen 29 jas aralyǵyndaǵy jastar qatysa alady. Ol úshin me.fpp.kz onlaın-platformasyna tirkelip, usynylǵanaltyn, kúmis nemese qola baǵyttaryn tańdaý kerek. Sodan keıin tálimgerdiń kómegimen óz qalaýymen is-sharalar men kesteni tańdap, jeke damý baǵdarlamasyn jasaı alady. Múmkindigi shekteýli jastardyń baǵdarlamaǵa qatysa alatyndaı jeke keste qurýyna da jaǵdaı jasalady. Taǵy bir aıta ketetin jaıt, baǵdarlama aıasynda eriktilerdiń qyzmeti Memleket basshysynyń Eriktiler jylynyń ashylýy kezinde aıtqan mindetterine sáıkes bolady.
«Elbasy medali» – bolashaq mektep túlekteri úshin de eldegi JOO-da bilimderin jalǵastyrýǵa baǵyttalǵan tyń qadam. Medal ıegerleriniń upaılary teń bolǵan jaǵdaıda Qazaqstan Respýblıkasynyń zańnamasynda belgilengen tártippen bilim grantyn, sondaı-aq oblys ákiminiń grantyn alýǵa tolyq quqyǵy bar.
«Elbasy medali» baǵdarlamasyn júzege asyrý baǵytynda oblysta barlyq qajetti sharalar alyndy. Baǵyn synamaqqa umtylǵan jastar úshin oblys ákimdigi bul maqsatqa qajetti qarjyny bóldi, tálimgerler iriktelip, oqytyldy», dedi Záýre Bazarǵalıqyzy.
Sol sekildi Tuńǵysh Prezıdent – Elbasy qorynyń bastamasymen júzege asyrylyp jatqan «El úmiti» jobasy aıasynda aýyl mektepteri oqýshylary arasynda «Myń bala» ulttyq olımpıadasy ótkizilýde.
Olımpıadanyń birinshi irikteý kezeńi 2020 jylǵy 24 aqpannan bastap 5 naýryzǵa deıin uıymdastyryldy. Oǵan oblys boıynsha aýyl mektepteriniń 9 myńnan astam 5-6 synyp oqýshylary qatysty. Onyń nátıjesi boıynsha 200 qatysýshy ekinshi kezeńge irikteldi.
Qazaqstan Respýblıkasy aýmaǵynda koronavırýstyq ınfektsııanyń paıda bolýyna jáne taralýyna jol bermeý jónindegi vedomstvoaralyq komıssııanyń 2020 jylǵy 25 mamyrdaǵy hattamasynyń negizinde 25-26 maýsymda óńirlerdegi Nazarbaev zııatkerlik mektebiniń bazasynda sanıtarlyq-qaýipsizdik sharalaryn saqtaı otyryp, olımpıadanyń ekinshi kezeńin ótkizý josparlanýda.
Ekinshi kezeńde fýnktsıonaldyq saýattylyq pen abstrakty-logıkalyq oılaýdy baǵalaıtyn kompıýterlik testileý júrgiziledi. Ekinshi kezeńdegi synaqtyń ashyq ári ádil ótýin qamtamasyz etý maqsatynda múddeli taraptar úshin beıne-translıatsııa uıymdastyrylady. Onlaın-translıatsııa siltemesi www.fpp.kz saıtyna jarııalanady.
Testileýdiń eń joǵarǵy upaıy – 100 ball. Qaıta testileý jáne apellıatsııa berý qarastyrylmaǵan.
Oqýshy jaýaptarynyń nátıjelerin óńdeý ár tapsyrmanyń qıyndyq deńgeıin anyqtaıtyn jáne test bólimi úshin jalpy balldaǵy úlesin esepteıtin avtomattandyrylǵan statıstıkalyq jáne psıhometrııalyq taldaý arqyly ótedi. Bul tásil nátıjelerdiń obektıvti jáne senimdi baǵalanýyn qamtamasyz etedi.
«Aýyl mektepteri úshin «Myń bala» ulttyq zııatkerlik olımpıadasynyń jeńimpazdaryn mamandandyrylǵan bilim berý uıymdaryna qabyldaý úshin 10 paıyz kvota belgilenedi», dedi Z.Ǵumarova.
