BQO-da EKSPO kórmesine 13 myńǵa jýyq bılet satyldy
Bul týraly búgin BQO ákimdiginde ótken jıynda oblys ákiminiń orynbasary Igor Steksov málim etti, dep habarlaıdy «QazAqparat» tilshisi.
Onyń aıtýynsha, halyqaralyq kórmeniń ashylýyna 100-den astam batysqazaqstandyq qatysty. 11 maýsym kúni de sonsha adam kórmeni tamashalady. Al búgin olardyń sany 450-den asty, sonyń ishinde Aqjaıyq aýdanynan 150-den astam oqýshy uıymdasqan túrde bardy. Alǵashqy aptanyń ózinde Batys Qazaqstannan EKSPO-2017 kórmesinde 3-4,5 myńdaı turǵyn bolmaqshy.
Halyqaralyq kórmeni kórsem deýshilerdiń qatary kún sanap kóbeıe túsýde. Osyǵan baılanysty oblys ákimi Altaı Kólginov basqarmalar basshylaryna nasıhat jáne uıymdastyrý jumystaryn júıeli júrgizýmen qatar halyqtyń az qamtylǵan toptaryna qoldaý kórsetýdi, sondaı-aq balalardyń sapar kezinde qaýipsizdigin qamtamasyz etýge erekshe nazar aýdarýdy tapsyrdy.
Aıta keteıik, Oral qalasynda EKSPO-2017 kórmesine barǵysy keletinder úshin arnaıy keńse ashylyp, jumys jasaýda.
