BQO-da ekpe alǵandar arasynda lotereıaǵa bas júldege avtokólik tigildi
ORAL. QazAqparat – Batys Qazaqstan oblysynda ekpe alǵandar arasynda ótkiziletin lotereıaǵa bas júldege avtokólik tigildi, dep habarlaıdy QazAqparat tilshisi.
BQO densaýlyq saqtaý basqarmasy basshysynyń mindetin atqarýshy Arman Qalıbekovtiń málim etkenindeı, lotereıaǵa ekpeniń eki komponentin alǵan tek óńir turǵyndary ǵana qatysa alady.
Arman Talǵatulynyń sózine qaraǵanda, lotereıada sondaı-aq uıaly telefondar, basqa da baǵaly zattar oınatylady. Oǵan qatysý úshin stopcovid.kz saıtynda tirkelý kerek. Lotereıa qorytyndylary bıylǵy 30 tamyzda shyǵarylady.
A.Qalıbekov óńirde epıdemıologııalyq ahýaldyń kúrdeli ekendigin jetkizdi.
«Kún saıyn statsıonarlarǵa ondaǵan naýqas aýyr jaǵdaıda túsedi. Kún saıyn derlik qaza tabý deregi tirkeledi. Asa qaýipti vırýs óte tez taralady. Qalypty jaǵdaıǵa oralý úshin ekpe qabyldaý qajet. Ujymdarda qyzmetkerler aýyrǵannan keıin kásiporyndar eleýli túrde ekonomıkalyq zııanǵa qalady. Ujymdyq ımmýnıtetti qalyptastyrý úshin qyzmetkerlerdiń keminde 60 paıyzy egilýi qajet. Ótinim túsken ýaqytta qalalyq emhanalar vaktsına egý úshin uıymdarǵa kóshpeli brıgadalar jiberýge daıyn», - dedi A.Qalıbekov.
Oblysta osy kezge deıin 92 896 adam vaktsınanyń birinshi, 61 459-y ekinshi komponentimen egildi. Sońǵy aptada aldyńǵymen salystyrǵanda, vaktsınatsııalaýdyń 51 paıyzǵa óskeni baıqalady. Lotereıa da turǵyndardy ekpege barynsha kóbirek tartý maqsatynda uıymdastyrylyp otyr.
Eske sala keteıik, budan buryn BQO-da ınfektsııalyq statsıonarda jatqandar sany 500-den asqanyn, maýsymda 2 200-ge jýyq adamnan koronavırýs anyqtalǵanyn jazǵan bolatynbyz.
