BQO-da ekonomıkalyq qylmystan 628 mln teńge zalal kelgen
ORAL. KAZINFORM — BQO boıynsha ekonomıkalyq tergep-tekserý departamentiniń óndirisinde jyl basynan beri 21 qylmystyq is tirkelse, sonyń 11-ine nemese 52 paıyzyna núkte qoıyldy.
BQO boıynsha ekonomıkalyq tergep-tekserý departamenti basshysynyń orynbasary Nurbol Rahmetovtiń óńirlik kommýnıkatsııalar qyzmeti alańynda ótken brıfıngte málim etkenindeı, aıaqtalǵan ister boıynsha memleketke 628 mln teńge zalal keltirilgen.
Tyıym salynǵan múlikti qosqanda, sonyń 93 mln teńgesi óteldi.
Nurbol Joldasulynyń sózine qaraǵanda, qazirgi kezde tergeý sotynyń sheshimimen qylmystyq ister boıynsha alynǵan 141 myń qorap temeki men 30 myńnan astam bótelke alkogol ónimin joıý sharalary júrgizilýde.
Onyń aıtýynsha, QR Úkimetiniń 2023 jylǵy 14 shildedegi № 589 qaýlysymen «Kóleńkeli ekonomıkaǵa qarsy is-qımyl jónindegi is-sharalardyń 2023-2025 jyldarǵa arnalǵan keshendi jospary» bekitilgen bolatyn.
Keshendi jospardy engizýdiń nátıjesinde ekonomıkadaǵy kóleńkeli aınalymnyń deńgeıi 2024 jyly 16,6 paıyzdan, 2025 jyly 15 paıyzdan aspaýy kerek.
Kóleńkeli ekonomıka memlekettiń ekonomıkalyq qaýipsizdigine eleýli zııan keltiredi jáne bıýdjetke qomaqty salyq túsimderiniń túsýine jol bermeıdi.
Osylaısha ekonomıka men zańdy bıznestiń qalypty jumys isteýine nuqsan keltiredi.
Ekonomıkalyq qyzmettiń barlyq derlik salalaryna áser etetin ekonomıkalyq quqyq buzýshylyqtardyń qoǵamdyq qaýpin eskere otyryp, olardyń aldyn alý jáne ekonomıkalyq qyzmet salasyndaǵy krımınogendik jaǵdaıdy beıtaraptandyrý quqyq buzýshylyqqa qarsy kúres salasyndaǵy memlekettik saıasattyń strategııalyq, basym baǵytyna aınaldy.
«Departament bıýdjet qarajatynyń jymqyrylýyn boldyrmaýǵa jáne olardy talan-tarajǵa salýǵa jol bermeýge baǵyttalǵan profılaktıkalyq jumystardy júrgizedi. Sondaı-aq sot úkimine sáıkes barlyq tárkilengen temeki ónimderi joıylýǵa jatady. Qarjy pıramıdalarymen kúres jumystary da udaıy nazarda», -dedi N.Rahmetov.
Eske sala keteıik, budan buryn Oralda «Invataksı» qyzmetine bólingen 53 mln teńgeni jymqyrǵandar tergelip jatqanyn jazǵan bolatynbyz.
