BQO-da ekologııalyq zańnamany buzǵandardan bıýdjetke 2 mlrd teńge óndirildi
ORAL. KAZINFORM — Batys Qazaqstan oblysynda jyl basynan beri 2,5 mlrd teńge bıýdjet qarajatynyń negizsiz jumsalýyna tosqaýyl qoıyldy. Bul týraly BQO prokýratýrasynyń birinshi jartyjyldyqtaǵy jumysty qorytyndylaǵan jıynynda aıtyldy.
BQO prokýratýrasynyń baspasóz qyzmetinen málim etkenindeı, tabıǵatty qorǵaý prokýratýrasynyń qadaǵalaý aktisi boıynsha ekologııalyq zańnamany buzǵany úshin jergilikti bıýdjetke 2 mlrd teńge aıyppul óndirildi.
Sondaı-aq paıdalanylmaǵan jerlerdi qaıtarý boıynsha jumys jalǵasýda. Jalpy aýdany 90 myń ga bolatyn 300-den astam jer ýchaskesi anyqtaldy. Sonyń ishinde quny 1,2 mlrd teńge bolatyn aýmaǵy 12 myń ga 85 ýchaske memleketke qaıtaryldy.
Bıznesti qorǵaý baǵytynda qabyldanǵan sharalarmen 1 148 kásipkerdiń quqyǵy qorǵalyp, ınvestorlardyń 20 máselesi oń sheshimin tapty. Atap aıtqanda, prokýratýranyń narazylyǵymen «Kondensat» AQ-ǵa qatysty zańsyz ákimshilik hattamanyń kúshi joıyldy, ınvestor 432,5 myń teńge aıyppuldan bosatyldy. Kináli laýazymdy qyzmetker jaýapkershilikke tartyldy.
Prokýrorlyq tekserý nátıjesinde Kaztalov aýdandyq veterınarııalyq stantsııasy bas býhgalteriniń 105,5 mln teńge bıýdjet qarajatyn jymqyrǵany belgili boldy. Sot úkimimen ol 7 jylǵa bas bostandyǵynan aıyryldy.
- Prokýrorlyq qadaǵalaý aktileri boıynsha 5 577 azamattyń konstıtýtsııalyq quqyǵy qorǵalady. Sonyń ishinde 2 983 jumysshynyń quqyǵy qalpyna keltirildi. Olardyń 118 jumys berýshi tarapynan eńbek mindetterin atqarý kezinde jazataıym oqıǵalardan mindetti saqtandyrylýy qamtamasyz etildi. Sonymen qatar prokýrorlyq qadaǵalaý sharalary boıynsha memleket paıdasyna 382 mln teńge óndirildi, - dep habarlady vedomstvodan.
Eske sala keteıik, budan buryn BQO-da jumysqa ornalastyrylǵan adamdarǵa 5 mln-ǵa jýyq teńgeniń negizsiz tólengenin jazǵan edik.
