BQO-da eki júkti áıel mingen kólik qar qursaýynan qutqaryldy
ORAL. QazAqparat - Batys Qazaqstan oblysynda qar qursaýynan kesheden beri 94 adam (úsheýi - balalar) qutqarylyp, 25 tehnıka shyǵaryldy, dep habarlaıdy QazAqparat tilshisi.
BQO Tótenshe jaǵdaılar departamentiniń baspasóz qyzmetinen alynǵan málimetke qaraǵanda, sondaı-aq 22 adam qaýipsiz jerge evakýatsııalandy. Atalǵan derekter Syrym, Shyńǵyrlaý jáne Báıterek aýdandarynda tirkeldi.
Atap aıtqanda, keshe saǵat túngi on eki shamasynda Aqsaı-Shyńǵyrlaý jolynyń 64-shaqyrymynda, Aşysaı aýylynan eki shaqyrym jerde 22 jeńil jáne 2 «GAZel» jolaýshylar kóligine kómek kórsetildi. Olarda 91 adam bolǵan.
Sondaı-aq 22 aqpanǵa qaraǵan túni Syrym aýdanynda Jympıty-Aqsaı jolynyń 11-shaqyrymynda jeńil kólik tazartylǵan jerge shyǵaryldy. Onyń ishinde úsh adam bolǵan, ekeýi - júkti áıelder.
22 aqpan kúni tańǵy saǵat beste Shyńǵyrlaý aýdanynda Shyńǵyrlaý-Ardaq jolynyń 20-shaqyrymynda 6 jeńil mashınaǵa jáne jolaýshylar otyrǵan «ÝAZ» avtokóligine kómek kórsetildi. Olarda bolǵan 20 adam evakýatsııalandy.
Osylaısha jyl basynan beri qar qursaýynan qutqarylǵandar sany 903 adamǵa jetti. 204 adam evakýatsııalandy, 405 tehnıka tazartylǵan jolǵa shyǵaryldy.
Eske sala keteıik, budan buryn BQO-da aýa raıyna baılanysty eskertý jarııalanǵanyn jazǵan bolatynbyz.
Keshe sondaı-aq qutqarýshylar Báıterek aýdanynda aýyryp qalǵan bes aılyq sábıdi aýrýhanaǵa jetkizdi.
Óńirde qardyń kóptiginen taǵy bir úıdiń tóbesi qulady.
Keshe boranǵa baılanysty joldar jabyldy.
