BQO-da eki jeńil kólik soqtyǵysyp, úsh adam zardap shekti
ORAL. QazAqparat – Batys Qazaqstan oblysynda eki jeńil kólik soqtyǵysyp, úsh adam zardap shekti, dep habarlaıdy QazAqparat tilshisi.
BQO TJ departamentiniń baspasóz qyzmeti málim etkenindeı, oqıǵa 22 jeltoqsan kúni saǵat 08.58-de Aqjaıyq aýdanynda boldy.
Oral-Atyraý joly men Chapaev aýylynyń kireberis tusynda «Toıota Kamrı» men «VAZ-2112» avtokólikteri túıisti.
Sonyń saldarynan jaraqat alǵan úsh adam Aqjaıyq aýdandyq ortalyq aýrýhanasyna jetkizildi. Olardyń ekeýi dárigerler qaraǵannan keıin aýrýhanaǵa jatýdan bas tartty.
Aldyn ala málimet boıynsha jabyq bas-mı jaraqatyn alyp, mańdaı tusy kógergen 37 jastaǵy er adam aýrýhanaǵa jatqyzyldy.
Qazirgi kezde oqıǵanyń jaı-japsary anyqtalý ústinde.
Eske sala keteıik, budan buryn Batys Qazaqstanda adam ólimine soqtyrǵan birneshe jol apaty bolǵanyn jazǵan edik.
