BQO-da eki qojalyq basshysy alaıaqtyqpen memleketten 3,1 mln teńge alǵan
ORAL. QazAqparat – Batys Qazaqstan oblysynda eki qojalyq basshysy jalǵan málimetpen memlekettik baǵdarlama boıynsha 3,1 mıllıon teńgeden astam qarjy alǵan, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen málim etkenindeı, Jánibek aýdany ákimdiginiń jumyspen qamtý ortalyǵynda júrgizilgen tekseris barysynda eki alaıaqtyq deregi anyqtaldy.
Atap aıtqanda, 59 jastaǵy sharýa qojalyǵynyń basshysy 2017-2021 jyldarǵa arnalǵan Nátıjeli jumyspen qamtý jáne jappaı kásipkerlikti damytý memlekettik baǵdarlamasy aıasynda qyzmetkerler týraly jalǵan málimet berip, 1 mln 273,440 myń teńge alǵan.
Dál osyndaı ádispen 45 jastaǵy «Zakarııa» ShQ basshysy 1 mln 902,250 myń teńgege qol jetkizgen.
Qazirgi kezde QR QK 190-baby 1-bóligine (alaıaqtyq) sáıkes sotqa deıingi tergeý amaldary júrgizilýde.
