BQO-da eki aýyl karantınge jabylyp, blokpostar qoıyldy
ORAL. QazAqparat – Batys Qazaqstan oblysynda koronavırýske shaldyǵý oqıǵalarynyń sany artyp otyr, dep habarlaıdy QazAqparat tilshisi.
BQO Taýarlar men kórsetiletin qyzmetterdiń sapasy men qaýipsizdigin baqylaý departamentinen túsken málimetke qaraǵanda, Jánibek aýdanynda buǵan deıin aýrý oshaqtary anyqtalǵan Qamysty jáne Borsy aýyldary karantınge jabyldy.
Eki aýyldyń kireberis joldaryna blokpostar qoıyldy.
BQO-da indetti juqtyrýdyń jańadan 38 jaǵdaıy anyqtalǵanyn buǵan deıin habarlaǵan bolatynbyz. Ósim deńgeıi 9,2 paıyzǵa jetti.
Koronavırýs anyqtalǵan 3 adam – Reseıde jumys isteıtin Almaty, Túrkistan oblystarynyń turǵyndary. «Syrym» avtoótkelinen ótý kezinde densaýlyqtaryna shaǵymy bolmaǵanmen, olar jedel járdemmen karantındik statsıonarǵa jatqyzylǵan.
Sondaı-aq 30 adam – buryn aýyrǵandarmen qarym-qatynasta bolǵandar. 4 patsıent profılaktıkalyq tekserý kezinde anyqtalsa, taǵy bireýi – Teńiz ken ornynda jumys jasaıtyn oblys turǵyny.
Osylaısha, Batys Qazaqstanda naýqastardyń jalpy sany 452-ge jetse, sonyń 251-i jazylyp shyqty.
Qazirgi tańda 201 adam oblystyq juqpaly aýrýlar aýrýhanasynda emdelýde. Oǵan qosa, provızorlyq statsıonarda – 20, karantındik statsıonarda – 180, úı karantıninde – 883 adam jatyr.
Eske sala keteıik, budan buryn Oral qalasynda tórt emhana karantınge jabylǵan bolatyn.
Sondaı-aq Qarashyǵanaq kenishi men Syrym aýdanynda da karantın jarııalanǵan edi.
