BQO-da eki adamnyń ólimine sebepshi bolǵan júrgizýshi bes jylǵa sottaldy
ORAL. QazAqparat - Batys Qazaqstan oblysynda eki adamnyń ólimine sebepshi bolǵan júrgizýshi bes jylǵa sottaldy, dep habarlaıdy «QazAqparat» tilshisi.
BQO sotynyń baspasóz qyzmetinen túsken málimetke qaraǵanda, Syrym aýdanynda atalǵan júrgizýshi jol erejesin saqtamaı, qarsy betke shyǵyp ketip, «Lada Granta» avtokóligimen soqtyǵysqan. Sonyń saldarynan «Lada Granta» avtokóliginde bolǵan eki júrgizýshi oqıǵa ornynda kóz jumsa, bireýi aýyr jaraqat aldy.
Sot otyrysynda sottalýshy óz kinásin moıyndap, marqumdardyń týystarynan keshirim surap, jasaǵan áreketine ókinetinin bildirdi.
Syrym aýdandyq sotynyń úkimimen júrgizýshi QR QK 345-baby 4-bóligine sáıkes aıypty dep tanylyp, bes jylǵa bas bostandyǵynan aıyrý jazasyn qaýipsizdigi tómen qylmystyq-atqarý júıesi mekemesinde óteıtin boldy. Sonymen qatar ol alty jylǵa kólik quralyn basqarý quqyǵynan aıyryldy.
Sot úkim shyǵarǵan kezde júrgizýshiniń buryn sottalmaǵanyn, turǵylyqty mekenjaıy men qyzmet ornynan oń minezdemesin, asyraýynda otbasy men kámeletke tolmaǵan balalary bar ekendigin eskerdi.
Sot úkimi zańdy kúshine engen joq.
Aıta keteıik, QR QK 345-baby 4-bóligi sanktsııasy belgili bir laýazymdy atqarý nemese belgili bir qyzmetpen aınalysý quqyǵynan 7 jylǵa deıingi jáne bas bostandyǵynan 5 jyldan 10 jylǵa deıingi merzimge aıyrýdy kózdeıdi.
