BQO-da eki adamdy óltirdi degen kúdikpen 2 turǵyn ustaldy
ORAL. QazAqparat – Batys Qazaqstan oblysynda eki adamdy óltirdi degen kúdikpen 2 turǵyn ustaldy, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, 4 sáýir kúni Báıterek aýdany Úlken Shaǵan aýyly mańyndaǵy orman ishinen órtenip ketken «Folksvagen Djetta» avtokóligi tabyldy.
Saraptama taǵaıyndalyp, sonyń nátıjesinde VIN kody boıynsha avtokóliktiń ıesi 1972 jylǵy turǵyn ekendigi anyqtaldy.
Jedel tergeý sharalary barysynda Kolesnoe eldi mekeniniń turǵyndary, 1972 jylǵy kólik ıesi men onyń azamattyq nekedegi 1974 jylǵy áıeliniń 25 naýryzdan 26-syna qaraǵan túni belgisiz jaǵdaıda joǵalyp ketkeni belgili boldy. Alaıda bul jóninde olardyń týysqandary men tanystary polıtsııaǵa júginbegen.
Osyǵan baılanysty BQO polıtsııa departamentiniń tergeý basqarmasy QR QK 99-babyna (adam óltirý) sáıkes qylmystyq is qozǵaý týraly sheshim qabyldady.
14 sáýir kúni asa aýyr qylmys jasaǵany úshin Oral qalasynyń 1977 jáne 1993 jylǵy turǵyndary kúdikti retinde anyqtalyp, qolǵa tústi.
«Qazir kúdiktiler ýaqytsha oqshaýlaý ızolıatorynda otyr. Tergeý amaldary júrgizilýde», dedi QazAqparat tilshisine BQO polıtsııa departamentiniń resmı ókili Bolatbek Belgibekov.
