BQO-da eki sý qoımasy salynady

ASTANA. KAZINFORM – Batys Qazaqstan oblysynda 50 gıdrotehnıkalyq nysannyń 25-ine jóndeý jumystary qajet. Sý sharýashylyǵy týraly oblys ákimi Narıman Tóreǵalıev aıtyp berdi.

Óńir ákiminiń aıtýynsha, búginde 14 sý qoımasyn qaıta jańǵyrtýǵa jobalyq-smetalyq qujattama daıyndalyp jatyr.

– Sý salasyn damytýdyń 2024-2028 jyldarǵa arnalǵan keshendi jospary aıasynda Úlken jáne Kishi ózender boıynda 38 mln tekshe metr bolatyn eki sý qoımasyn salý josparlanyp otyr, – dedi N.Tóreǵalıev elordada Ortalyq kommýnıkatsııalar qyzmetinde.

Onyń aıtýynsha, sý basý qaýpiniń aldyn alý maqsatynda 2,9 mlrd teńgege 19 qorǵanys bógetin qalpyna keltirý jumystary aıaqtaldy. Bógetterdiń jalpy uzyndyǵy – 37 shaqyrym.

Kanaldardyń ótkizý qabiletin jaqsartý úshin úsh jylda 281 shaqyrym kanalǵa mehanıkalyq tazartý jumystary júrgizildi. Kelesi jyly 150 shaqyrym tazartylady.

Sonymen qatar, bıyl uzyndyǵy 192 shaqyrym bolatyn Jánibek sýarý-sýlandyrý júıesin qaıta jańǵyrtý jumystary bastaldy. Jobanyń quny – 4,6 mlrd teńge.

Buǵan deıin Narıman Tóreǵalıev agrarlyq salaǵa 50,6 mlrd teńgege qoldaý kórsetilgenin aıtqan edi.