BQO-da eki malshynyń boranda úsip ólýine baılanysty qylmystyq is qozǵaldy

ORAL. KAZINFORM — Batys Qazaqstan oblysynda ótken jyly 13 jeltoqsan kúngi boranda Jánibek aýdanynda eki malshy joǵalyp ketip, keıin denesi tabylǵan bolatyn.

BQO boıynsha eńbek ınspektsııasy departamentinen málim etkenindeı, osy oqıǵaǵa qatysty arnaıy komıssııa qurylyp, jumys istedi. Komıssııa otyrysyna jumys berýshi – sharýa qojalyǵynyń basshysy, oblystyq kásipodaqtar ortalyǵynyń ókili qatysty.

- Tergep-tekserý aıasynda jazataıym oqıǵanyń sebebi men zań buzýshylyqtar anyqtaldy. Bolǵan jaǵdaı úshin jaýapkershilik 100 paıyz jumys berýshige júkteldi. Materıal BQO Polıtsııa departamentine jiberildi, - dep habarlady vedomstvodan.

BQO Polıtsııa departamenti baspasóz qyzmetiniń naqtylaýynsha, qazirgi ýaqytta atalǵan derek boıynsha Jánibek aýdanynyń polıtsııa bóliminde qylmystyq is tergelip jatyr.

Tergeý amaldary aıaqtalǵannan keıin zańnamada kózdelgen tártippen tıisti protsessýaldyq sheshim qabyldanady.

Eske sala keteıik, budan buryn BQO-da boranda joǵalyp ketken úsh adamnyń denesi tabylǵanyn jazǵan edik.

Sondaı-aq BQO-da taǵy bir er adamnyń denesi tabyldy.