BQO-da eki ǵasyrǵa jýyq tarıhy bar aýylda jańa ákim saılandy
ORAL. KAZINFORM — Batys Qazaqstan oblysynyń úsh aýdanynda jańadan aýyl ákimderin saılaý ótkizildi.
BQO aýmaqtyq saılaý komıssııasynan málim etkenindeı, Bókeı ordasy aýdany Orda aýyldyq okrýgi ákimi bolý úshin úsh kandıdat saılaýǵa tústi.
Saılaý qorytyndysynda daýys berýshilerdiń 83,27 paıyzy Ǵaısa Mahımovty qoldady.
Osyǵan deıin Han ordasy tarıhı-mádenı, arhıtektýralyq-etnografııalyq mýzeı-qoryǵynyń dırektory qyzmetin atqarǵan Ǵaısa Temirbolatuly endi tarıhı aýylǵa jetekshilik etetin bolady.
Aldaǵy jyly Jáńgir han irgesin qalaǵan Orda aýylyna 200 jyl tolady.
Sondaı-aq Bórli aýdanynda Nurlan Ǵazıev qaıtadan Keńtúbek aýyldyq okrýginiń ákimi bolyp saılandy. Al Azat Qojanııazov Dostyq aýyldyq okrýginiń tizginin ustady.
Jánibek aýdanynda Aqoba aýyldyq okrýginiń turǵyndary Nurlybek Jakınge qaıtadan senim artty.
Eske sala keteıik, budan buryn Oral qalasynda Zachagan kentinde ákim saılanǵanyn jazǵan edik.