BQO-da eki ǵasyrǵa jýyq tarıhy bar aýylda mádenıet úıi ashyldy
Bókeı ordasy aýdany Han ordasy aýylynda mádenıet úıi kúrdeli jóndeýden keıin qaıta ashyldy, dep habarlaıdy Kazinform.
Tarıhı aýyldaǵy eńseli ǵımarattardyń biri – mádenıet úıiniń ashylý rásimine qatysqan aýdan ákimi Nurlybek Daýmov Naryn óńirinde kúı atasy Qurmanǵazydan bastap Dáýletkereı, Seıtek, Mahambet, Naýsha Bókeıhanovtar, Shamǵon Qajyǵalıev, Tuıaqberdi Shámelov jalǵastyrǵan óner dástúriniń joıylmaı kele jatqanyn atap ótti.
«Memleket basshysynyń tapsyrmasyna sáıkes elimizde mádenıet salasyna da eleýli kóńil bólinip keledi. Birqatar baǵdarlamalar qolǵa alynyp, jańadan mádenıet nysandarynyń boı kóterip, sala qyzmetkerleriniń jalaqysy ósýi – sonyń aıǵaǵy. Bıyl Han ordasy mýzeı-qoryǵynda vızıt ortalyǵy men ákimshilik ǵımaraty paıdalanýǵa berildi. Jyl sońyna taman kórshiles Bısen aýylynda 300 oryndyq zamanaýı mádenıet úıi iske qosylmaqshy. Sol sekildi aldaǵy jyly Uıaly aýylynda mádenı-sporttyq keshen salynady. Osynyń bári mádenıet salasy qyzmetkerleriniń, ásirese, jastardyń qyzmetine tyń serpin beredi dep senemiz», – dedi N.Daýmov.
BQO mádenıet, tilderdi damytý jáne arhıv isi basqarmasynyń basshysy Saıran Dúısenov «Aýyl – el besigi» baǵdarlamasy aıasynda qolǵa alynǵan mádenıet úıiniń kúrdeli jóndelýine oblys ákimi Narıman Tóreǵalıevtiń qoldaýymen qosymsha qarjy bólingenin jetkizdi.
«1801 jyly Bókeı sultan bastap Edil-Jaıyq aralyǵyna qonystanǵan eldiń ortalyǵy bolyp esepteletin tarıhı Han ordasy aýyly sońǵy jyldary kórkeıip keledi. Mýzeıdiń vızıt ortalyǵy men ákimshilik ǵımaratyna qosa Alma Orazbaeva men Seıtqalı Meńdeshevtiń úıleri qalpyna keltirildi. Aýrýhana qaıtadan salynýda. Taǵy bir atap ótetin jaıt, aımaq basshysynyń qoldaýymen aldaǵy jyly bes birdeı arhıv ǵımaraty salynbaqshy. Mine, sonyń alǵashqysy osy Bókeı ordasy aýdanynda boı kótermekshi. Jalpy, aldaǵy úsh jylda óńirdegi arhıv ǵımarattaryn túgeldeı jańartý kózdelýde», – dedi S.Dúısenov.
«Naryn ájeleri» ansambliniń otaý tikkenine 12 jyl boldy. Osy ýaqyt ishinde oblystyq baıqaýlarǵa baryp, júldeger atandyq, kontsertterge únemi qatysyp júrmiz. Mine, endi jarqyraǵan mádenıet úıinde óner kórsetetinimizge qýanyshtymyz», - deıdi mádenıet salasynyń ardageri Roza Túmenova.
Aıta keteıik, Han ordasy – Han saraıy, qazynashylyq ǵımaraty, meshit jáne basqa da tarıhı nysandary qalpyna keltirilgen biregeı aýyl.
2026 jyly Bókeı handyǵyna – 225 jyl, irgesin Jáńgir han qalaǵan Han ordasy aýylyna eki ǵasyr tolmaqshy.
