BQO-da eki adam 68 jastaǵy áıelden 300 myń teńge bopsalaǵan

ORAL. KAZINFORM – Batys Qazaqstan oblysynda 1957 jylǵy áıeldi bopsalaǵan eki er adam ustaldy.

BQO polıtsııa departamentiniń baspasóz qyzmetinen málim etkenindeı, olar 68 jastaǵy zeınetkerden 300 myń teńge talap etken.

Kúdiktiler egde jastaǵy áıeldi qorqytyp, nemeresin aman-esen kórgisi kelse, atalǵan kólemdegi aqshany berýin suraǵan. 

— Nemeresi buǵan deıin kúdiktiniń biriniń týysymen nekede bolǵandyǵy anyqtaldy. Jedel is-sharalar barysynda polıtseıler bopsalaýshylardy 50 myń teńge alyp jatqan jerinde ustady. Jábirlenýshi buǵan deıin olarǵa 200 myń teńge bergen. Tergeý barysynda kúdiktilerdiń buryn birneshe ret qylmystyq jaýapkershilikke tartylǵany anyqtaldy. Olardyń biri jazasyn óteý ornynan shyqqannan keıin nebári 20 kúnnen soń qaıta qylmys jasaǵan. Qazirgi ýaqytta kúdiktiler ýaqytsha ustaý ızolıatoryna qamaldy. Bopsalaý faktisi boıynsha qylmystyq is qozǵaldy. Tergeý júrgizilip jatyr, — dep habarlady vedomstvodan.

Kúdiktiler úsh jyldan jeti jylǵa deıin bas bostandyǵyn shekteý nemese dál osy merzimge bas bostandyǵynan aıyrý jazasyna tartylýy múmkin. 

Eske sala keteıik, budan buryn oraldyq turǵyndardyń týrıstik fırmadan 5 mln teńge óndirip alǵanyn jazǵan bolatynbyz.