BQO-da egis alqaptarynyń sýǵa ketýine baılanysty arnaıy komıssııalar shyǵyndy eseptemek
ORAL. KAZINFORM – Batys Qazaqstan oblysynda sý tasqynyna qaramastan kóktemgi dalalyq jumystar josparǵa sáıkes júrgizilip jatyr.
BQO ákiminiń orynbasary Qalııar Aıtmuhambetovtiń aıtýynsha, óńirdegi eń astyqty aýdan – Báıterekte jyldaǵydaı jumystar atqarylýda.
«Egis jumystarynyń barysyn kórip, dıqandarmen betpe-bet kezdesip, pikirlesý úshin Báıterek aýdanynda jumys saparymen boldym. Birqatar sharýamen, atap aıtqanda, «Gepard» JShS, «Shýnaıbekov» ShQ, «Altyn Bolashaq» ShQ, «Mar-El» ShQ, «Asan Aýyl» JShS basshylarymen, ujymymen júzdesip, kóktemgi egis jumystaryn tıimdi júrgizýge baılanysty áńgimelestik», - dedi Qalııar Shadııaruly.
Ár sharýaǵa memleket tarapynan kórsetiletin qoldaý túrleri, ıaǵnı sýarmaly eginshilikti damytý úshin oǵan qajetti jabdyqtardyń qunynan 80 paıyzǵa deıin kóterip, jergilikti bıýdjet esebinen sýbsıdııalaý júrgiziletini aıtyldy. Otandyq zaýyttardan satyp alynǵan tyńaıtqyshtar qunynyń 60 paıyzy qazynadan óteletini, satyp alynǵan elıtalyq jáne birinshi reprodýktsııaly tuqymdar úshin sýbsıdııalaý úlesi ulǵaıatyny da sóz boldy.
Bıyldan bastap otandyq tyńaıtqyshtarǵa tólenetin sýbsıdııa kólemi ulǵaıyp, sharýalarǵa tyńaıtqysh baǵasynyń 40 paıyzyn bólip tóleý múmkindigi berildi. Sonymen qatar dıqandar da ózderiniń oıynda júrgen saýaldaryna naqty jaýap aldy. Osylaısha, egis jumystarynyń josparǵa sáıkes ótip jatqany taǵy da bir pysyqtaldy.
«Bıyl ósimdik sharýashylyǵyn sýbsıdııalaý baǵdarlamalary men qyzmetter kórsetýge jergilikti bıýdjetten 2 mlrd teńgege jýyq qarjy bólindi: sýbsıdııalaýǵa 1,4 mlrd teńge, bul – byltyrǵydan 27%-ǵa artyq. Sýbsıdııaǵa ótinimder qabyldanyp, tólem júrgizilip jatyr. Demeý qarjylarynan bólek, «Agrarlyq nesıe korporatsııasy» AQ arqyly «Keń dala» baǵdarlamasy boıynsha kóktemgi dalalyq jumystardy qarjylandyrýǵa jyl basynan beri 2,4 mlrd teńge bólinip, tolyq ıgerildi», - deıdi oblys ákiminiń orynbasary.
Jalpy respýblıka boıynsha sharýalardyń egis jumystaryn ońtaıly merzimde josparlanǵan mejede ótkizýin qamtamasyz etý úshin «Agrarlyq nesıe korporatsııasy» AQ arqyly qosymsha qarjy kózi tartylyp, BQO-ǵa taǵy 7 mlrd teńge bólindi. Nesıe sharýalarǵa 5%-ben, kepildik máselesin jeńildetý arqyly, ıaǵnı «Damý» kásipkerlikti damytý qory» AQ 85% kepil bolýymen egin egý jáne egin orý jumystaryn júrgizý úshin beriledi.
Búgingi tańda oblys dıqandary 119 myń gektarǵa jýyq (62%) alqapqa dándi daqyl, 41 myń gektardan astamǵa (36%) maıly daqyl jáne 13,5 myń gektardaı jerge (31%) mal azyqtyq daqyldar ekti. Munyń syrtynda 745 ga alqapqa kartop, 418 ga kókónis, 281 ga baqsha (15%) otyrǵyzyldy.
Byltyr kúzde 2024 jyldyń ónimine 97,1 myń ga kúzdik dándi daqyldar egildi, sonyń ishinde kúzdik bıdaı – 90,1 myń ga, qara bıdaı – 6,6 myń ga jáne trıtıkale – 460 ga.
Aýdan ákimdikteriniń málimetinshe, saqtalǵan egistiń jaǵdaıy mynadaı: 31,2 myń gektary (32,2%) jaqsy, 60,1 myń ga (62%) qanaǵattanarlyq, 0,8 myń ga (0,8%) nashar dep baǵalandy. Esepten shyǵarylǵan kúzdikter kólemi – 5 myń ga (5%).
«Aýdan jáne qala ákimdikteri usynǵan jedel aqparattarǵa sáıkes, sý tasqynynan kúzdikter egisi, jylyjaı men sharýashylyq janyndaǵy qoımadaǵy tyńaıtqyshtar búlingen. 4 957 ga kúzdik dándi daqyldar sý astynda qaldy. Aýyl sharýashylyǵy mınıstriniń 2024 jylǵy 17 mamyrdaǵy №167 buıryǵyna sáıkes, «Aýyl sharýashylyǵy salasynda tabıǵı sıpattaǵy tótenshe jaǵdaılar nátıjesinde jeke jáne zańdy tulǵalarǵa keltirilgen zalaldy óteý qaǵıdalaryn bekitý týraly» ereje qabyldandy. Ósimdik sharýashylyǵy boıynsha sý basýdan kelgen shyǵyndarǵa ótemaqy tóleý úshin aýdandar men qalada arnaıy komıssııalar qurylýda», - dedi Q. Aıtmuhambetov.
Eske sala keteıik, BQO-da sý tasqynynan egis dalasy da zııan shekkenin jazǵan edik.
