BQO-da eginshilikte 60 900 tonna tyńaıtqysh engizý kózdelip otyr
ORAL. KAZINFORM — Memleket basshysy júktegen mindetterge qol jetkizý maqsatynda Batys Qazaqstan oblysynda tyńaıtqyshtar qunyn sýbsıdııalaý baǵdarlamasy júzege asyrylyp keledi.
BQO aýyl sharýashylyǵy basqarmasynyń basshysy Jasulan Halıýllınniń málim etkenindeı, ótken jyly óńirde 47 112 tonna tyńaıtqysh engizilse, bıyl bul kólem 60 900 tonnaǵa jetkizilmek.
Onyń sózine qaraǵanda, bıyl osy baǵdarlama boıynsha 629 mln teńge bólindi, bul ótken jylǵydan (571 mln teńge) artyq.
— Qoldanystaǵy qaǵıdaǵa sáıkes otandyq zaýyttar óndirgen tyńaıtqyshtar avanstyq tólem tetigi arqyly qunynan 60, sheteldik tyńaıtqyshtar qunynan 50 paıyz sýbsıdııalanady. Oblys sharýalary osy avanstyq tólem tetigi arqyly 2024 jyldan beri ammofos jáne ammıak selıtrasyn satyp alyp, egiske engizip jatyr. Tyńaıtqysh qunynyń 40 paıyzyn qosymsha qun salyǵymen birge sharýalar otandyq zaýyttyń («Kazfosfat» JShS — ammofos, «KazAzot» AQ — ammıak selıtrasy) esepshotyna aýdarady, qalǵan QQS eseptelmegen qunynyń 60 paıyzyn basqarma otandyq zaýyttyń arnaıy esepshotyna avanstyq tólem retinde jiberedi, — deıdi J.Halıýllın.
Basqarma basshysynyń túsindirýinshe, otandyq zaýyttardyń arnaıy shotyna avanstyq tólem retinde 150 mln teńge aýdarylady («Kazfosfat» JShS — 98,2 mln teńge «KazAzot» AQ — 51,8 mln teńge), ıaǵnı otandyq ammofostyń tolyq quny 294 506 teńge bolsa, sýbsıdııalaý nátıjesinde fermerler úshin 142 175 myń teńgege, al ammıak selıtrasynyń tolyq baǵasy 187 920 teńgeni qurasa, sharýalarǵa 90 720 teńgege shyǵady.
— Tyńaıtqyshtardyń qalǵan túrleri boıynsha, ıaǵnı 2026 jyly sýbsıdııalanatyn tyńaıtqyshtardyń túrleri men sýbsıdııa normalary belgileý úshin baǵalaryn taldaý jumystary aıaqtaldy. Qazir qaýly jobasy kópshilik talqylaý úshin «Ashyq NQA» normatıvtik quqyqtyq aktilerdiń portalyna jarııalandy. Jospar boıynsha naýryz aıynyń ortasyna deıin tyńaıtqyshtardyń túrleri men sýbsıdııa normalary oblys ákimdiginiń qaýlysymen bekitilip, sosyn ótinimderdi qabyldaýdy bastaımyz, — dep qosty J.Halıýllın.
Eske sala keteıik, budan buryn Batys Qazaqstanda barlyq egis kólemi 626 myń gektar bolatynyn jazǵan edik.