BQO-da eginshilikti ártaraptandyrý baǵytynda ne istelip jatyr

ORAL. KAZINFORM — Batys Qazaqstan oblysynda bıdaı kólemin ońtaılandyryp, maıly, mal azyqtyq jáne dándi burshaqty daqyldardy kóbeıtýge baǵyt ustalyp otyr. 

BQO ákiminiń orynbasary Qalııar Aıtmuhambetovtiń málim etkenindeı, agroqurylymdardyń osyndaı tásilge kóshýi nátıjesinde bıyldyń ózinde burshaqty daqyldar 1,9 esege nemese 22,5 myń gektarǵa, sonyń ishinde noqat — 2,4 ese (11,2 myń ga), jasymyq 1,6 esege (11,3 myń ga), al maıly daqyldar 33,4 paıyzǵa artty.

Onyń aıtýynsha, maıly daqyldar 137 myń gektarǵa egilip, odan 104 myń tonna ónim jınaldy. 208,8 myń gektarǵa sebilgen mal azyqtyq daqyldardan 125,3 myń tonna ónim tústi. 

— Egis alańdaryn ártaraptandyrý, sonyń ishinde bıdaı jáne arpa alqaptaryn qysqartý kózdelip otyr. Sonyń nátıjesinde 2028 jyly maıly daqyldar 143,5 myń, mal azyqtyq daqyldar alqaby 246 myń, kartop 2,5 myń gektarǵa ulǵaıtylmaq. Aýyl sharýashylyǵy daqyldarynyń elıtalyq tuqymdarynyń úlesi 10,4 paıyzǵa deıin jetedi. Munyń mańyzdylyǵyn egin sharýashylyǵymen aınalysatyn sharýalar túsinip otyr, — dedi Q.Aıtmuhambetov. 

Onyń aıtýynsha, óńirde maýsymaralyq kezeńde ónim saqtaý maqsatynda syıymdylyǵy 64,9 myń tonna 30 zamanaýı qoıma jumys isteıdi. Bul kólem qajettilikti 100 paıyzǵa jabady.

Eske sala keteıik, budan buryn Batys Qazaqstanda 365 myń tonna astyq jınalǵanyn jazǵan edik.