BQO-da «Dostyq» klýbynyń 10 jyldyǵy atalyp ótildi
Mektep-balabaqsha dırektorynyń oqý isi jónindegi orynbasary Natalııa Lapkonyń aıtýynsha, dál on jyl buryn mektepte Elena Kııanskaıanyń bastamasymen Qazaqstan halqy kishi assambleıasynyń jastar qanaty quryldy. Mıchýrın mektebi muǵalimderi, ata-analary men oqýshylarynyń kómegimen jumysy jandana túsken atalǵan uıym keıin «Dostyq» klýbyna aınaldy. Onyń quramynda bastapqyda toǵyz ulttyń ókilderi bolsa, qazir 11-ge jetti. Orys, sheshen, ázerbaıjan, ýkraın, koreı, belorýs, ózbek, tatar, nemis, armıan ulty ókilderiniń basyn biriktiretin klýb maqsaty - ultaralyq kelisimdi nasıhattaý, jas jetkinshekterdi Qazaqstanda turatyn halyqtar mádenıetimen tanystyrý. Osy baǵytta «Dostyq» klýbyna mártebeli meımandar jıi kelip, táýelsiz eldegi birlik pen yntymaq jóninde áńgimelep beredi.
«Dostyq» klýbynyń 10 jyldyǵyna mektep ujymy myqtap daıyndalyp, ýkraın, tatar, ázerbaıjan, sheshen etnomádenı birlestikteriniń ókilderi shaqyryldy. Qazaqstan halqy BQO assambleıasy tóraǵasynyń orynbasary, hatshylyq meńgerýshisi Ǵaısa Qapaqov, Zelenov aýdany ákiminiń orynbasary Asylulan Dosjanov, «Nur Otan» partııasy aýdandyq fılıaly tóraǵasynyń birinshi orynbasary Nurjan Dúzbatyrov syndy qurmetti qonaqtar jańadan ashylǵan mektep murajaıymen tanysyp, «Tatýlyq tutqasy, birliktiń besigi» atty merekelik kontsertti tamashalady.
«Táýelsiz elimizde Qazaqstan halqy assambleıasy biregeı qoǵamdyq uıymǵa aınaldy. Sonyń bir nyshanyn osy mektepten kórýge bolady. Úlken-kishi demeı, ortaq maqsat jolynda toptasqan «Dostyq» klýby músheleri úlgi etýge turady. Bul kóp ultty memleketimizdegi ulttar tatýlyǵynyń jarqyn kórinisi ispettes», dedi Ǵaısa Qapaqov.
Shara barysynda klýbtyń belsendi músheleri alǵyshat, gramotalarmen marapattaldy. San ult ókilderiniń án-bıleri oryndalyp, muǵalimder horynyń «Týǵan jer» ánimen támamdalǵan dostyq merekesi jınalǵandarǵa erekshe qýanysh syılady. 
