BQO-da Dına Nurpeıisovanyń 160 jyldyǵyna oraı respýblıkalyq dombyrashylar baıqaýy ótedi

ORAL. QazAqparat – Batys Qazaqstan oblysynda QR Táýelsizdiginiń 30 jyldyǵy aıasynda Qazaqstannyń halyq ártisi, kúı anasy Dına Nurpeıisovanyń 160 jyldyǵyna arnalǵan «Ásemqońyr» respýblıkalyq dombyrashylar baıqaýy ótedi, dep habarlaıdy QazAqparat tilshisi.

Oblystyq halyq shyǵarmashylyǵy ortalyǵynyń dırektory Máýlet Jubatovtyń óńirlik kommýnıkatsııalar qyzmeti alańynda ótken brıfıngide málim etkenindeı, atalmysh is-shara 9-10 jeltoqsan kúnderi Dınanyń týǵan jeri – Jańaqala aýdany Qyzyloba aýyldyq mádenıet úıinde ótedi.

Dına Nurpeıisovanyń kúılerin halyqqa keńinen nasıhattap, jas urpaqqa jetkizý maqsatynda uıymdastyrylyp otyrǵan saıysqa Nur-Sultan qalasy, Almaty, Qyzylorda, Mańǵystaý, Aqtóbe jáne Batys Qazaqstan oblystarynan 15 úmitker qatysyp, baq synaǵaly otyr.

M.Jubatovtyń aıtýynsha, úsh kezeńnen turatyn baıqaýǵa bıyl 75 jasqa tolǵan elge tanymal kúıshi-ustaz, Qazaq Ulttyq óner ýnıversıtetiniń professory Aıtjan Toqtaǵan bastaǵan qazylar alqasy tórelik etedi.

«Qurmanǵazy men Dáýletkereıge qaraǵanda, Dınanyń kúıleri oryndalýy óte bólek, kúrdeli, saýsaq qaǵystary jaǵynan erekshelenip turady. Oǵan kez kelgen dombyrashynyń tisi batpaıdy. Sondyqtan kúı anasynyń altyn qorda saqtalyp qalǵan jazbalaryn tyńdap, túpnusqany buzbaı oryndaý talap etiledi», dedi brıfıngige qatysqan belgili dombyrashy, Qurmanǵazy atyndaǵy mýzyka kolledjiniń oqytýshysy, qazylar alqasynyń múshesi Erbol Ǵubaıdýllın.

Eske sala keteıik, budan buryn elordada kúıshi-ustaz Aıtjan Toqtaǵannyń mereıtoılyq keshi ótkenin jazǵan bolatynbyz.