BQO-da Derkóldegi sý deńgeıi Tasqala tusynda qaýipti shegine jetip, tómen tústi
ORAL. QazAqparat - Batys Qazaqstan oblysynda Derkól ózenindegi sý deńgeıi Tasqala aýdany ortalyǵy Tasqala aýyly tusynda qaýipti shegine deıin jetti, dep habarlaıdy «QazAqparat» tilshisi.
BQO TJ departamentiniń jedel kezekshisi, azamattyq qorǵaý aǵa leıtenanty Rollan Nurjanovtyń aıtýynsha, 7 sáýir kúni saǵat 23.00-de Derkól-Tasqala gıdrobeketinde sý deńgeıi 519 santımetrge jetti. Soǵan baılanysty TJ departamenti eskertý jarııalap, tıisti sharalar alyndy. Búgin tańerteń sýdyń beti qaıtyp, 484 santımetrge deıin tústi.
«Jaýapty qyzmetkerler túnimen kezekshilikte boldy. Sýǵa ketýden amanbyz. Qazir muz joq, sý jaqsy ketip jatyr. Jaǵdaı baqylaýda», dedi «QazAqparat» tilshisine aýdan ákiminiń orynbasary Lıýtsııa Jubanyshqalıeva.
Aıta keteıik, 2011 jylǵy qatty tasqyn kezinde Tasqala aýylynyń da bir bóligin sý basyp, úıleri sýǵa ketkender úshin jańadan baspana salynǵan bolatyn.
