BQO-da densaýlyq saqtaý salasyn qarjylandyrýǵa 15,2 mlrd teńge bólindi
ORAL. QazAqparat - Batys Qazaqstan oblysynda bıyl densaýlyq saqtaý salasyn qarjylandyrýǵa 15,2 mlrd teńge bólindi, dep habarlaıdy «QazAqparat» tilshisi.
Oblystyq densaýlyq saqtaý basqarmasynyń basshysy Qanat Tósekbaevtyń aıtýynsha, 1 jeltoqsanǵa deıin kózdelgen 13,5 mlrd teńge tolyqtaı ıgerildi. Materıaldyq-tehnıkalyq bazany nyǵaıtýǵa 2,9 mlrd teńge qarastyrylsa, sonyń 2,0 mlrd teńgesi ıgerildi.
2016-2019 jyldarǵa arnalǵan «Densaýlyq» memlekettik baǵdarlamasyn júzege asyrý maqsatynda óńirlik is-sharalar josparyna sáıkes tıisti jumystar atqarylýda. Osyǵan oraı 2019 jylǵa qaraı turǵyndardyń ómir súrý uzaqtyǵyn 73 jasqa jetkizý kózdelýde. Memlekettik baǵdarlamalar boıynsha negizgi kórsetkishter oryndalyp otyr. Mysaly, 1 myń turǵynǵa shaqqanda jalpy ólim-jitim kórsetkishi 4,1 paıyzǵa tómendep, 7,0-di (2016 jyly - 7,3) qurady. Ótken jyly 2 ana ólimi tirkelse, bıyl osyndaı 1 jaǵdaı oryn aldy. Nárestelerdiń ólim-jitim kórsetkishi 1 myń tiri týylǵanǵa eseptegende, 12,2 paıyzǵa tómendep, 6,5-ti (2016 jyly - 7,4) qurady. Týberkýlezben syrqattaný men odan ólim-jitim kórsetkishi qalypty bolsa, qaterli isikterden kóz jumǵandar 100 myń turǵynǵa shaqqanda, 3,1 paıyzǵa azaıyp, 80,1-di (2016 jyly - 82,7) qurady. Oblysta tek qan aınalymy júıesi aýrýlarynan ólim-jitim ǵana 2,8 paıyzǵa ósip otyr (100 myń turǵynǵa - 175,25, 2016 jyly - 170,5).
Densaýlyq saqtaý salasynda memlekettik-jekeshelik áriptestik jobalary qolǵa alyndy. Aıtalyq, sharýashylyq júrgizý quqyǵyndaǵy oblystyq klınıkalyq aýrýhanaǵa magnıttik-rezonanstyq tomografty lızıngke satyp alý boıynsha konkýrstyq rásimder aıaqtalyp, sonyń qorytyndysymen «Dal Kazahstan» JShS jeńimpaz bolyp tanyldy. Sondaı-aq Shyńǵyrlaý aýdany Lýben aýylynda aýysymyna 35 adamdy qabyldaıtyn dárigerlik ambýlatorııa qurylysyna «Atameken» UKP tarapynan oń qorytyndy berildi. Quny 167,356 mln teńgege baǵalanǵan jobaǵa ekonomıkalyq qorytyndy alý úshin qujattar oblystyq ekonomıka jáne bıýdjettik josparlaý basqarmasyna joldandy. Oraldaǵy №7 qalalyq emhanany kúrdeli jóndeýden ótkizý, jabdyqtarmen jaraqtandyrýmen birge senimgerlik basqarýǵa berý jobasy boıynsha da osyndaı jumystar atqaryldy.
BQO ákimdiginde kompıýterlik tomograf satyp alý (boljamdy quny - 350 mln teńge) jáne qalalyq jedel medınıtsalyq stansasyn senimgerlik basqarýǵa berý týraly usynystar qoldaý tapty.
«Medıtsınalyq-sanıtarııalyq alǵashqy kómek uıymdarynda kezekti azaıtý maqsatynda Oral qalasynyń barlyq emhanalarynda «Elektrondy tablo» júıesi engizilip, qyzmet sapasy jaqsara túskenin de aıtýǵa bolady. Sondaı-aq densaýlyq saqtaý júıesin aqparattandyrý aıasynda sıtýatsııalyq ortalyq ornatylyp, jedel medıtsınalyq basqarýdyń avtomattandyrylǵan júıesi jańǵyrtyldy. Bul jedel járdem boıynsha shaqyrtýǵa jetý ýaqytyn 3 mınýtqa, ıaǵnı 12 mınýttan 9 mınýtqa deıin qysqartýǵa múmkindik berdi. Oblystyń medıtsınalyq uıymdarynda onlaın-baılanysty qamtamasyz etetin «Kazmedinform» medıtsınalyq aqparattyq júıesi engizilip, ol 40 uıymdy qamtydy. Jergilikti medıtsına júıelerin engizý jáne densaýlyq saqtaý uıymdaryn kompıýterlik tehnıkamen jaraqtandyrýdyń 2017-2018 jyldarǵa arnalǵan jol kartasy da bekitildi. Sondaı-aq Batys Qazaqstan oblysynda qaǵazsyz qujat aınalymyn engizý baǵytynda pılottyq joba júzege asyrylýda. Qazirgi tańda №3 qalalyq emhana men oblystyq klınıkalyq aýrýhananyń terapevtik bólimshesinde daıyndyq jumystary júrgizilýde. Bul jumys aldaǵy qańtar aıy boıy oryndalatyn bolady», dedi «QazAqparat» tilshisine Qanat Tósekbaev.
