BQO-da densaýlyq saqtaý salasyn qarjylandyrý 3,3 esege ósti
Medıtsına qyzmetkerlerin oblys ákiminiń orynbasary Marat Toqjanov Táýelsizdiktiń 25 jyldyǵymen jáne Jańa jylmen quttyqtap, aldaǵy ýaqytta da Elbasy tapsyrmasyna sáıkes densaýlyq saqtaý salasyn damytý isine óz úlesterin qosa beretindikterine senim bildirdi.
Oblystyq densaýlyq saqtaý basqarmasynyń basshysy Qamıdolla Irmenovtiń aıtýynsha, elimiz táýelsizdik alǵannan bergi merzimde óńirde 102 densaýlyq saqtaý nysany salynyp, travmatologııa, kardıohırýrgııa, oftalmologııa jáne basqa salalar boıynsha 100-den astam joǵary sapaly medıtsınalyq kómek túri engizildi. Táýelsizdik jyldary adam ómiriniń uzaqtyǵy 6,9 jylǵa kóbeıip, 1991 jylǵy 64,8-den 2015 jyldyń qorytyndysy boıynsha ortasha 71,7 jasqa jetti. 2016-2019 jyldarǵa arnalǵan «Densaýlyq» memlekettik baǵdarlamasyna sáıkes 2020 jylǵa qaraı adam ómiriniń uzaqtyǵyn 73-ke jetkizý kózdelýde.
Oblystyń densaýlyq saqtaý salasyn qarjylandyrý 2005 jylǵy 6,6 mlrd. teńgeden 2015 jylǵy 22,1 mlrd. teńgege deıin, ıaǵnı 3,3 esege ósti.
Kóliktik jáne qashyqtyqtan emdeý medıtsınasy damyp keledi. Jyljymaly jedel keshender men qondyrǵylardyń kómegimen jyl saıyn 200 eldi mekende 35 myńnan astam adam medıtsınalyq kómek alýda. 9 medıtsınalyq ortalyqta joǵary bilikti mamandar jyl saıyn 1500-den astam qashyqtyqtan keńes beredi. Dáriger jetispeýshiligi 2007 jylǵy 400-den 2016 jylǵy 40 mamanǵa deıin, ıaǵnı on ese tómendedi. Oblysqa sońǵy bes jylda 400-den astam jas maman tartyldy. Qazirgi tańda dárigerler sany 1477-ge jetti. Jyl saıyn el ishinde 500-ge jýyq dáriger, 2500-deı orta býyn qyzmetkeri óz biliktiligin arttyrady. 2011 jyldan beri 52 dáriger shetelde oqysa, sonyń 27-si «Bolashaq» baǵdarlamasy boıynsha bilim-biligin kóterdi.
Óńirde densaýlyq salaý isiniń ozyq qyzmetkerleri az emes. Budan buryn Táýelsizdiktiń 25 jyldyǵyna oraı oblystyq aýrýhananyń bólimshe meńgerýshisi Asylbek Bahaev «Shapaǵat» medalimen marapattalsa, bul joly birqatar qyzmetkerlerge «QR Táýelsizdigine 25 jyl» merekelik medali tabys etildi. Sondaı-aq oblystyq densaýlyq saqtaý basqarmasynyń bas mamany Kúnsulý Nııarova, qalalyq jedel járdem stansasy dırektorynyń orynbasary Elena Grışenko, oblystyq perınataldyq ortalyq dırektorynyń orynbasary Eset Eralın «Densaýlyq saqtaý isiniń úzdigi», №5 qalalyq emhana dırektory Sáýle Bulqasheva, oblystyq onkologııalyq dıspanser dırektorynyń orynbasary Taıman Amanov «Densaýlyq saqtaý isin damytýǵa qosqan úlesi úshin» tósbelgisimen marapattaldy. Taǵy bir top qyzmetkerge oblys ákiminiń alǵyshattary, mınıstrliktiń qurmet gramotalary tapsyryldy.
