BQO-da densaýlyq saqtaý salasyn tsıfrlandyrý óz tıimdiligin kórsetýde
Sandýǵash Joldasqyzynyń aıtýynsha, Elbasy 5 qazan kúngi Joldaýynda medıtsınalyq qyzmet sapasyna aıryqsha nazar aýdarǵan bolatyn.
Memleket basshysy atap ótkenindeı, aldaǵy jyldyń 1 qańtarynan bastap barlyq emhanalar men aýrýhanalar medıtsınalyq qujattardy qaǵazsyz, tsıfrlyq nusqada júrgizýge kóshýi tıis.
Osy oraıda Batys Qazaqstan oblysynda pılottyq rejımde bıylǵy qańtardan medıtsınalyq qujattardy qaǵazsyz júrgizý engizile bastady. Joba aıasynda qaǵaz túrindegi nusqalar birtindep alynyp tastalady.
Sandýǵash Keńesovanyń sózine qaraǵanda, óńirdegi medıtsına uıymdarynda «Kazmedinform» medıtsınalyq aqparattyq júıesi, qalanyń 6 emhanasynda elektrondyq kezekti basqarý júıesi, jedel medıtsınalyq járdemdi basqarýdyń "ADIS" avtomattandyrylǵan júıesi engizildi.
2017 jyldyń qarasha aıynan bastap k-vrachu.kz mobıldik qosymshasy engizildi, ony PlayMarket, App Store dúkenderi arqyly tegin júktep alyp, Android, iOS operatsııalyq júıesinde jumys isteıtin mobıldik qurylǵylar arqyly dárigerdiń qabyldaýyna jazylýǵa bolady. Atalǵan mobıldik qosymshada tirkelgen paıdalanýshylardyń sany 22 548-ke jetti.
Mobıldik qosymshanyń tıimdiligi mynada, sol arqyly dárigerler jumysynyń kestesimen tanysýǵa, turǵylyqty jeri boıynsha tirkelgen ýchaskeni anyqtaýǵa, dáriger kartochkasyn qaraýǵa, oblystyń medıtsınalyq uıymdaryn qaraýǵa jáne olardy kartada tabýǵa, dárigerdi úıge shaqyrýǵa, dárigerdiń qabyldaýyna jazylýǵa jáne qajet bolǵan jaǵdaıda jazylýdy ózgertýge bolady, Push habarlamalar jáne dárigerge barý jóninde eskertý qyzmetteri bar.
Taǵy bir aıta ketetin jaıt, dárigerdiń qabyldaýyna jazylýǵa arnalǵan k-vrachu.kz veb-portaly jumys isteıdi. Veb-portal arqyly tirkelgen ýchaskeni izdeýge, dárigerdiń (jalpy tájirıbelik dáriger) qyzmet kórsetetin aýdanyn qaraýǵa, dárigerdi úıge shaqyrýǵa, dárigerdiń qabyldaýyna onlaın jazylýǵa, dárigerdiń kestesin, onyń biliktiligin qaraýǵa, dárigerdi baǵalaýǵa bolady.
Medıtsınalyq-sanıtarııalyq alǵashqy kómek uıymdarynda kezektilikti azaıtý úshin qalanyń barlyq emhanalarynda «Elektrondy tablo» elektrondyq kezekti basqarý baǵdarlamasy engizildi. Qalanyń alty emhanasynda jáne «Derkól» dárigerlik ambýlatorııasynda «Kazmedınform» medıtsınalyq aqparattyq júıesimen ıntegratsııalandyrylǵan elektrondyq kezekti basqarý júıesi jumys jasaıdy.
Barlyǵy 105 mekeme (121-den) qaǵazsyz túrge kóshirildi. Dárigerdi elektrondy tsıfrlyq qoltańba arqyly avtorızatsııalaý múmkindigi bar.
Sondaı-aq densaýlyq saqtaý júıesin aqparattandyrý aıasynda oblystyq jedel medıtsınalyq járdem qyzmetiniń onlaın rejıminde jumys isteýi úshin sıtýatsııalyq ortalyqty ornatý arqyly jedel medıtsınalyq járdemdi basqarýdyń avtomattandyrylǵan júıesi jańǵyrtyldy, bul naýqasqa jetýdiń ýaqytyn 12 mınýttan 9 mınýtqa deıin, 3 mınýtqa qysqartýǵa, sonymen birge dıspetcherlik qyzmetke kelip túsken shaqyrtýdy óńdeýdiń ýaqytyn 5 mınýttan 3-4 mınýtqa deıin qysqartýǵa múmkindik berdi, aýrýhanaǵa deıingi qaıtys bolý jaǵdaıy 0,8 promılıden 0,4 promılıge deıin tómendedi. Qalalyq jedel járdem stantsııasy 32 dana mobıldik ARM (planshettermen) jaraqtaldy, qamtý 100 paıyzdy quraıdy, oblys boıynsha 138 dana sanıtarlyq avtokólik GPS - monıtorıngke qosyldy (qamtý 100 paıyz). 2018 jyldyń 1 qańtarynan bastap baǵdarlama boıynsha 16918 shaqyrtýǵa qyzmet kórsetildi. Atalǵan baǵdarlama oblys boıynsha jedel medıtsınalyq járdem brıgadalarynyń geolokatsııasyn kórip otyrýǵa múmkindik beredi, dıspetcher shaqyrtý týraly aqparatty (shaqyrtýdyń sebebi, patsıenttiń aty-jóni, meken jaıy) brıgadanyń planshetine jiberedi.
Fılıal dırektorynyń málimdeýinshe, ınfraqurylymdyq ındıkatorlar boıynsha búgingi tańda medıtsınalyq uıymdar 4477 kompıýtermen jaraqtaldy, 2016 jyly 1064 dana (152,3 mln teńge), 2017 jyly - 656 dana kompıýterlik tehnıka satyp alyndy, satyp alý jergilikti bıýdjet (162,5 mln teńge) jáne medıtsınalyq uıymdardyń óz qarajaty esebinen júrgizildi, oblystyń medıtsınalyq uıymdary kompıýterlik tehnıkamen 100 paıyzǵa qamtamasyz etildi. Oǵan qosa medıtsına uıymdaryn 510 dana kompıýterlik tehnıkamen jańartý úshin 242,5 mln teńge somasyna bıýdjettik ótinim berildi.
«Tsıfrlyq Qazaqstan» memlekettik baǵdarlamasyn júzege asyrý aıasynda densaýlyq saqtaý basqarmasy «Batys Qazaqstan oblysynda densaýlyq saqtaý basqarmasyn tsıfrlandyrý jónindegi jol kartasyn» ázirlep, ol BQO ákiminiń orynbasarymen bekitildi.
«Kúni búgin 383 medıtsınalyq mekemeniń 263-i ınternet jelisine qosylǵan. Bul rette shalǵaıdaǵy shekaralas aýdandardyń medıtsınalyq pýnktteri, feldsherlik-akýsherlik pýnktteri (barlyǵy 120 nysan nemese 30 paıyzy) ınternetke qosyla qoıǵan joq. Osy baǵytta «Qazaqtelekom» AQ-men medıtsına uıymdaryn keń jolaqty ınternetke qosý jumystary júrgizilýde», dedi S.Keńesova.
