BQO-da densaýlyq saqtaý salasynda 180 maman jetispeıdi

ORAL. KAZINFORM — Batys Qazaqstan oblysynda 7 myńnan astam medıtsına qyzmetkeri jumys isteıdi.

BQO densaýlyq saqtaý basqarmasy basshysynyń orynbasary Aınash Ǵubaıdýllınanyń óńirlik kommýnıkatsııalar qyzmeti uıymdastyrǵan dóńgelek ústel otyrysynda málim etkenindeı, sonyń ishinde 1 774-i dáriger bolsa, 6 513-i – medıtsına mamandary.

Aınash Jubanyshqyzynyń sózine qaraǵanda, qazirgi tańda oblysta 180 dáriger mamannyń jetispeýshiligi baıqalady. 

Degenmen óńir basshysynyń qoldaýymen jergilikti qarajat esebinen jas mamandardy jumysqa tartý boıynsha is-sharalar júrgizilip keledi. 

- Sonyń nátıjesinde 2022 jyldan beri 393 dáriger kelse, sonyń 207-si nemese 52,6 paıyzy aýyldyq jerlerge jiberildi. 256 mamanǵa 1 mlrd 652 mln teńge kóleminde birjolǵy kótermeaqy berildi. Atap aıtqanda, shalǵaı aýylǵa barǵandarǵa 8 mln, qalaǵa kelgenderge 5 mln teńgeden tıedi, - dedi A.Ǵubaıdýllına.

Onyń aıtýynsha, sala kadrlaryn daıarlaý baǵytynda 2022-2024 jyldary rezıdentýraǵa 505 grant berilgen. Jergilikti bıýdjet esebinen 2017-2024 jyldary jalpy medıtsına mamandyǵy boıynsha 284 grant, 2021-2024 jyldary rezıdentýraǵa 42 grant bólindi.

- Bıyl jergilikti qazyna esebinen jalpy medıtsına mamandyǵyna 45 túlekti jiberý josparlanǵan. Mundaǵy jańalyq, buryn granttar tek Aqtóbe medıtsına ýnıversıtetinde oqýǵa beriletin edi. Qazirgi tańda Astana men Almaty qalalaryndaǵy rezındentýraǵa jergilikti bıýdjetten – 55, respýblıkadan 240 grant bólinip otyr. Bul kórsetkishter – Ata zańymyz bekitken basty qundylyqtardyń biri – azamattardyń ómiri men densaýlyǵyn saqtaý baǵytynda memleket tarapynan jasalyp jatqan naqty qadamdardyń aıǵaǵy, - dep túıindedi oıyn A.Ǵubaıdýllına.

Eske sala keteıik, budan buryn Batys Qazaqstanda 326 dárigerdiń jetispeıtinin jazǵan edik.